قر مادەنيەت جانە اقپارات ءمينيسترى ايدا بالاەۆا بۇل وقيعانىڭ ءمان-ماڭىزىنا توقتالىپ, ەكى ەل اراسىنداعى كەلىسىمنىڭ ناتيجەسىندە جۇزەگە اسقانىن اتاپ ءوتتى.
«2022 جىلى ەكى ەلدىڭ پرەزيدەنتتەرى دەڭگەيىندە بەيجىڭدە قازاق مادەني ورتالىعىن, ال استانادا قىتاي مادەني ورتالىعىن اشۋ جونىندە شەشىم قابىلدانعان بولاتىن. ەكى ەلدىڭ مينيسترلىكتەرى بىرلەسىپ اتسالىسىپ, بۇگىن سول كەلىسىمنىڭ ناقتى ناتيجەسىن كورىپ وتىرمىز. بۇل – تاريحي وقيعا. ويتكەنى بەيجىڭ قالاسىنىڭ قاق ورتاسىندا قازاق مادەنيەتى مەن مۇراسىن تانىستىراتىن ورتالىقتىڭ اشىلۋى – ءبىزدىڭ ونەرىمىزدى, ادەبيەتىمىزدى, كينو سالامىزدى كەڭىنەن ناسيحاتتاۋعا زور مۇمكىندىك بەرەدى», — دەدى مينيستر.
ورتالىقتىڭ قۇرىلىمىنا مىڭنان استام كىتاپتى قامتيتىن شاعىن كىتاپحانا, قازاق تاريحى مەن قولونەرىن, زەرگەرلىك بۇيىمدارى مەن ۇلتتىق كيىم ۇلگىلەرىن تانىستىراتىن مۇراجايلىق بۇرىش, كورمە جانە كينوزال كىرەدى. سونىمەن قاتار قازاق ءتىلىن ۇيرەنۋگە ارنالعان ەكى وقۋ سىنىبى اشىلدى.
ايدا بالاەۆانىڭ ايتۋىنشا, بۇل ورتالىق تەك مادەني كورمە ورنى ەمەس, كەشەندى جوبالاردى جۇزەگە اسىراتىن الاڭعا اينالادى.
«مۇندا كەلۋشىلەرگە ۇلتتىق مۋزىكا, سونىڭ ىشىندە دومبىرا ونەرى دە ناسيحاتتالادى. ادەبيەتىمىزدى, تاريحىمىزدى جان-جاقتى تانىستىرۋعا مۇمكىندىك بار. قازاقتىڭ مادەنيەتى بەيجىڭ تورىندە لايىقتى تۇردە كورسەتىلەتىن بولادى», — دەدى مينيستر.
وسىلايشا, بەيجىڭدە اشىلعان قازاق مادەني ورتالىعى ەكى حالىق اراسىنداعى مادەني بايلانىستاردى تەرەڭدەتىپ, قازاقستان مەن قىتايدىڭ دوستىق قارىم-قاتىناسىن جاڭا دەڭگەيگە كوتەرمەك.
