كاسىپكەر

اۋىلداستارىنا مونشا سالىپ بەردى. ەندىگى ويى – تەحنيكالىق قىزمەت كورسەتۋ ستانساسى مەن قۇرىلىس تسەحىن اشۋ  بايتەرەك اۋىلىنىڭ تۇر­عىندارى ەندى مونشا ىزدەپ, الىسقا سابىلمايتىن بولدى. «كوشى-قون» باعدارلاماسى بويىنشا رەسەيدەن وسىندا كوشىپ كەلگەن جەكە كاسىپكەر ءوز قاراجاتىنا 20 ورىندى مونشا تۇرعىزىپ بەردى. ەل تاۋەلسىزدىگى جاريالانعالى قىزىلجار وڭىرىنە الىس-جاقىن شەتەلدەردەن 7 مىڭعا جۋىق وتباسى ات­باسىن بۇرعان ەكەن. سولاردىڭ ءبىرى – جانات وتىنشيەۆ. ول وسىدان بەس جىلداي بۇرىن تۇمەن وبلىسىنىڭ گولىشمان اۋدانىنان قونىس اۋداردى. اتاجۇرتقا ورالىسىمەن 4 بالا تاربيەلەپ وتىرعان كەلىنشەگى جانار ەكەۋى جەكە شارۋا­سىن بىردەن دوڭگەلەتىپ اكەتتى. ءۇش بولمەنىڭ ءبىر قاناتىن ازىق-ت ۇلىك جانە تۇرمىستىق زاتتار ساتاتىن دۇكەنگە اينالدىردى. جالعا العان جىلىجايعا كوكونىس ەگىپ, مول ءونىم جيناعان كەزدەرى از ەمەس. ەڭبەك دەسە جانىپ سالا بەرەتىن ونىڭ العا قويعان ماقساتىنا جەتكەنشە تىنىم تاپپايتىن قاسيەتى بار. بىلتىر كۇزدە 20 ورىندى قوعامدىق مونشا سالۋعا كىرىسكەن ەدى. جەرگىلىكتى اكىمدىك ونىڭ بۇل نيەتىن قولداپ, اۋىل شەتىنەن جەر تەلىمىن بولۋگە كومەكتەسكەن. جۋىردا نىساندى پايدالانۋعا بەرىپ, اۋىلداستارىنىڭ العىسىنا يە بولدى. قولى ەپسەكتى ازامات 700 شارشى مەتر اۋماقتى جىلىتاتىن تۇرمىستىق جىلۋ قازاندىعىن ورناتىپ العاننان كەيىن تاعى ءبىر ويىن جۇزەگە اسىرۋعا كىرىسكەن. اتاپ ايتقاندا, تەحنيكالىق قىزمەت كورسەتۋ ستانساسىن اشۋ ءۇشىن ۇيمەن جاپسارلاس عيمارات ازىرلەپ, قۇرال-جابدىقتار ورناتتى. اتالمىش نىساندى تولىق ىسكە قوسۋعا 360 ۆولتتىق ەلەكتر قۋاتىنىڭ جەتىمسىزدىگى بوگەت بولىپ تۇرعان جايى بار. ونىڭ ەندىگى ءبىر ماقساتى – «جۇمىسپەن قامتۋ-2020» مەملەكەتتىك باعدار­لاماسى شەڭبەرىندە جەڭىلدەتىلگەن نەسيە الۋ ارقىلى قۇرىلىس تسەحىن ۇيىمداستىرۋ. وعان 10 سوتىق جەر تەلىمىن الىپ, ورىن سايلاپ قويدى. 270 ءتۇتىنى بار وسىدان 6 جىل بۇرىن ىرگەتاسى قالانعان ءباي­تەرەك ەلدى مەكەنىن «ورالماندار اۋىلى» دەپ تە اتايدى. مەكتەپ جوقتىعىنان جۇزگە جۋىق وقۋشى اۋدان ورتالىعىنا قاتىناپ وقي­دى. مۇندا ەكى-ءۇش دۇكەننەن باسقا الەۋمەتتىك نىسانداردىڭ تاپشىلىعىن ەسكەرسەك, جانات سەكىلدى جەكە كاسىپكەرلەردىڭ ەل­گە, جەرگە ءسىڭىرىپ جاتقان ەڭبەگى وزگەلەر ۇيرەنۋگە تۇرارلىق ونەگەلى ءۇردىس دەر ەدىك. ءومىر ەسقالي, «ەگەمەن قازاقستان». سولتۇستىك قازاقستان وبلىسى, قىزىلجار اۋدانى. سۋرەت: http://medya.todayszaman.com