قازىرگى تاڭدا ەكى ەل اراسىنداعى بىرلەسكەن ينۆەستيتسيالىق جوبالاردىڭ جالپى پورتفەلى 212 جوبانى قۇرايدى. ولاردىڭ قۇنى – 60,5 ملرد اقش دوللارى. بۇل باستامالار شامامەن 50 مىڭ جاڭا جۇمىس ورنىن اشۋدى كوزدەيدى. ونىڭ ىشىندە 65 جوبا جالپى قۇنى 12,3 ملرد دوللار كولەمىندە ىسكە اسىرىلىپ, 15,9 مىڭ جۇمىس ورنى اشىلدى. سونداي-اق 49 جوبا ىسكە اسىرىلۋ ساتىسىندا تۇر (9,1 ملرد دوللار, 25,1 مىڭ جۇمىس ورنى), ال 98 جوبا پىسىقتالۋ كەزەڭىندە (38,9 ملرد دوللار, 28 مىڭ جۇمىس ورنى). جوبالار اگروونەركاسىپ كەشەنى, مەتاللۋرگيا, كولىك-لوگيستيكا, جاڭارتىلاتىن ەنەرگەتيكا جانە مۇناي-گاز ماشينا جاساۋ سالالارىن قامتيدى.
پرەزيدەنت تاپسىرماسى اياسىندا قىتايلىق Dalian Hesheng Holdings كومپانياسىمەن استىقتى تەرەڭ قايتا وڭدەۋ بويىنشا كەلىسىم جاسالدى. جوبا اقمولا وبلىسىندا تىك ينتەگراتسيالانعان يندۋستريالىق پارك سالۋدى كوزدەيدى. ينۆەستيتسيا كولەمى العاشقى كەزەڭدە 500–800 ملن دوللاردى, كەيىنگى كەزەڭدەردە تاعى 1 ملرد دوللاردى قۇرايدى. قايتا وڭدەۋ قۋاتى باستاپقىدا جىلىنا 1 ملن توننا بيداي بولسا, كەزەڭ-كەزەڭىمەن 3 ملن تونناعا دەيىن جەتكىزىلمەك. جوبا اياسىندا 2 مىڭعا جۋىق جاڭا جۇمىس ورنى اشىلادى. ينفراقۇرىلىمدىق بولىگىنە كومىر جىلۋ ەلەكتر ستانتسياسى مەن كومىر-حيميا كەشەنىنىڭ قۇرىلىسى كىرەدى. كومىردى قايتا وڭدەۋ ناتيجەسىندە جىلىنا 150–400 مىڭ توننا سۇيىق اممياك وندىرىلمەك. بۇل باستاما اگروسەكتوردى جاڭعىرتىپ, اۋىل شارۋاشىلىعى ونىمدەرىنە تۇراقتى سۇرانىس قالىپتاستىرادى جانە قوسىلعان قۇنى جوعارى ونىمدەردىڭ ەكسپورتتىق الەۋەتىن ارتتىرادى.
اگروونەركاسىپ سالاسىنداعى تاعى ءبىر ءىرى جوبا – قىتايلىق Fufeng Group كومپانياسىنا تيەسىلى. جامبىل وبلىسىندا كومپانيا جۇگەرىنى تەرەڭ قايتا وڭدەۋ بويىنشا يندۋستريالىق پاركتىڭ قۇرىلىسىن باستادى. مۇندا كراحمال, ليزين, ناتري گلۋتاماتى جانە وزگە دە بيوفەرمەنتاتسيالىق ونىمدەر وندىرىلەتىن بولادى. جوبانىڭ جالپى قۇنى 800 ملن دوللاردى قۇرايدى. قازىرگى تاڭدا Fufeng قازاقستاندىق فەرمەرلەرمەن 300 مىڭ توننا جۇگەرى جەتكىزۋگە وففتەيك-كەلىسىمشارت جاساستى. كومپانيا باسقارماسىنىڭ توراعاسى لي سيۋچەن قازاقستاندى Fufeng ونىمدەرىن ەۋروپاعا ەكسپورتتاۋ ءۇشىن نەگىزگى حاب رەتىندە قاراستىراتىنىن مالىمدەدى.
2025 جىلى تاۋ-كەن كەشەنىندە دە ماڭىزدى كەلىسىمدەر جاسالدى. قىتايلىق East Hope Group كومپانياسى پاۆلودار جانە قوستاناي وبلىستارىندا تولىق تسيكلدى اليۋميني كلاستەرىن قۇرۋ جوباسىن جۇزەگە اسىرۋدا. جوبا شيكىزاتتى وندىرۋدەن باستاپ دايىن ءونىم شىعارۋعا دەيىنگى بارلىق پروتسەستى قامتيدى. جىلىنا 2 ملن توننا گلينوزەمدى قايتا وڭدەۋ جوسپارلانعان. Kazakh Invest دەرەكتەرى بويىنشا, جوبانىڭ قۇنى 12 ملرد دوللاردان اسۋى مۇمكىن, بۇل ونى قازاقستانداعى ەڭ ءىرى مەتاللۋرگيالىق باستاماعا اينالدىرادى. سونىمەن قاتار, 10 مىڭ جاڭا جۇمىس ورنى اشىلىپ, وڭىرلىك ەكونوميكاعا سەرپىن بەرمەك.
جامبىل وبلىسىندا تولىق تسيكلدى بولات قۇيۋ زاۋىتىنىڭ قۇرىلىسى باستالدى. ينۆەستور – قىتايلىق Fujian Hengwang Investment Co., Ltd. جوبا ارنايى ەكونوميكالىق ايماق «جىبەك جولى» اۋماعىندا ىسكە اسىرىلىپ, جىلىنا 3 ملن تونناعا دەيىن بولات وندىرۋگە مۇمكىندىك بەرەدى. جالپى ينۆەستيتسيا كولەمى 756 ملن دوللاردى قۇرايدى. قۇرىلىس كەزىندە 1,5 مىڭنان استام, ال ىسكە قوسىلعاننان كەيىن 2,5 مىڭنان استام جاڭا جۇمىس ورنى اشىلادى. وندىرىلەتىن ءونىم قازاقستاننىڭ ىشكى نارىعىنا دا, ورتالىق ازيا مەن ەۋروپا ەلدەرىنە ەكسپورتقا دا باعىتتالادى. سونىمەن بىرگە شۋ قالاسىندا تۇرعىن ۇيلەر سالىنىپ, الەۋمەتتىك ينفراقۇرىلىمعا قولداۋ كورسەتىلەدى.
