وبلىستىق ءبىلىم باسقارماسىنىڭ باسشىسى نۇربەك ورشىبەكوۆتىڭ ايتۋىنشا, جاڭا وقۋ جىلىندا وڭىردەگى 523 ورتا ءبىلىم بەرۋى ۇيىمىندا 247 مىڭنان استام ءبىلىم الۋشى مەكتەپكە كەلەدى. ولاردىڭ 20 مىڭعا جۋىعى 1 سىنىپقا بارادى.
قازىرگى تاڭدا وڭىردەگى 1 291 ءبىلىم مەكەمەسىندە 338 مىڭنان استام بالا مەكتەپكە دەيىنگى, ورتا, تەحنيكالىق جانە كاسىپتىك بىلىممەن قامتىلىپ, 40 مىڭعا جۋىق پەداگوگ قىزمەت اتقارۋدا. بيىل ءبىلىم بەرۋ سالاسىن دامىتۋعا 344,3 ملرد تەڭگە بولىنگەن.
وبلىستاعى 621 بالاباقشادا 63 مىڭنان اسا بالا تاربيەلەنۋدە. 2-6 جاس ارالىعىنداعى بالالاردىڭ قامتىلۋى – 96,1 پايىز, ال 3-6 جاس ارالىعىندا – 100 پايىز. قامتۋ ۇلەسىن ارتتىرۋ ءۇشىن بيىل 1 628 ورىندىق 18 جەكەمەنشىك بالاباقشا ىسكە قوسىلادى.
وسى جىلى وڭىردە 26 ءبىلىم نىسانىنىڭ قۇرىلىسى جۇرگىزىلۋدە. جىل سوڭىنا دەيىن 10 جاڭا مەكتەپ پەن 5 قوسالقى عيمارات پايدالانۋعا بەرىلەدى. «كەلەشەك مەكتەپتەرى» ۇلتتىق جوباسى اياسىندا قورداي اۋدانىنىڭ قاراكەمەر جانە قاراسۋ اۋىلدارىندا 300 ورىندىق, ال تاراز قالاسىندا 600 ورىندىق مەكتەپ اشىلادى.سونىمەن قاتار 1 قىركۇيەكتە 4 توزىعى جەتكەن مەكتەپتىڭ ورنىنا جاڭا عيمارات پايدالانۋعا بەرىلمەك.
جالپى 16 نىسان كۇردەلى, 41 نىسان ورتاشا جوندەۋدەن وتۋدە. مەملەكەت باسشىسىنىڭ تاپسىرماسىنا سايكەس ءۇش جىل ىشىندە وبلىستاعى 66 مەكتەپ جاڭارتىلادى. بيىلدىڭ وزىندە 10 ءبىلىم وشاعى قايتا جاڭعىرادى.
جامبىل وبلىسى
