Xinhua اگەنتتىگى كەزدەسۋدى تاريحي كونتەكستە قاراستىردى. جۋرناليستەر توقاەۆتىڭ ساپارى ەكىنشى دۇنيەجۇزىلىك سوعىستاعى جەڭىستىڭ 80 جىلدىعىنا ارنالعان ءىس-شارالارمەن تۇسپا-تۇس كەلگەنىن اتاپ ءوتتى. قىتاي ءۇشىن بۇل سيمۆولدىق مانگە يە: مۇنداي شارالارعا قازاقستاننىڭ قاتىسۋى ەكى ەلدىڭ جاقىندىعىن جانە قارىم-قاتىناستىڭ سەنىمدى سيپاتىن ايعاقتايدى. نەگىزگى نازار سي ءتسزينپيننىڭ: «الەمدە قانداي وزگەرىستەر بولماسىن, قىتاي مەن قازاقستان تاتۋ كورشىلىك ساياساتىن ۇستانىپ, ادىلەتتى حالىقارالىق ءتارتىپ ورناتۋعا كۇش سالۋى كەرەك» دەگەن سوزىنە اۋدارىلدى.
CGTN تەلەارناسى مۇلدە باسقا قىرىن العا تارتتى. وندا كەلىسسوزدەردىڭ ناقتى ناتيجەلەرى باستى نازارعا شىقتى. كورەرمەندەرگە تاراپتاردىڭ 20-دان استام كەلىسىمگە قول قويعانى ەسكە سالىندى: ەنەرگەتيكا مەن تەحنولوگيادان باستاپ, ءبىلىم بەرۋ, سپورت جانە جابايى تابيعاتتى قورعاۋعا دەيىن. CGTN توقاەۆتىڭ: «قازاقستان مەن قىتاي قارىم-قاتىناستارى تاريحتاعى ەڭ جوعارى دەڭگەيگە جەتتى» دەگەن سوزىنە سىلتەمە جاسادى, سونداي-اق وتكەن جىلعى رەكوردتىق ساۋدا كورسەتكىشتەرىن كەلتىردى.
«استانا مەن پەكين ءبىر-ءبىرىن باتىل قولداپ, ىنتىماقتاستىقتى جاڭا دەڭگەيگە شىعارۋ كەرەك», — دەپ اتاپ ءوتتى سي تسزينپين.
Gov.cn مەملەكەتتىك پورتالى بولسا, جاعدايدى الدەقايدا ۇستامدى باياندادى. وندا قول قويىلعان قۇجاتتار جايلى ەگجەي-تەگجەي ايتىلماي, ديپلوماتيالىق تۇجىرىمدارعا عانا توقتالدى.
«حالىقارالىق جاعدايداعى وزگەرىستەرگە قاراماستان, قىتاي مەن قازاقستان ارقاشان تاتۋ كورشى ءارى سەرىكتەس بولىپ قالا بەرەدى», — دەپ كەلتىرەدى رەسۋرس قىتاي باسشىسىنىڭ ءسوزىن.
ال قحر سىرتقى ىستەر مينيسترلىگى ءوز مالىمدەمەسىندە سەرىكتەستىكتىڭ ستراتەگيالىق سيپاتىنا ەرەكشە ەكپىن جاسادى. مينيسترلىكتىڭ پايىمىنشا, قىتاي مەن قازاقستان — ء«بىر-بىرىنە سەنىپ, ارقا سۇيەي الاتىن كورشىلەر». سونداي-اق ەنەرگەتيكالىق ىنتىماقتاستىق, كولىك دالىزدەرىن دامىتۋ جانە مادەني الماسۋلاردىڭ ماڭىزدىلىعى بولەك اتاپ ءوتىلدى. اسىرەسە ەكى ەل اراسىنداعى مادەني الماسۋ جىلىنىڭ قارساڭىندا مۇنىڭ ءمانى زور ەكەنى كورسەتىلدى.
جالپى, قىتايلىق جەتەكشى باق-تاردىڭ بارلىعى ورتاق ويعا توعىستى: سي تسزينپين مەن قاسىم-جومارت توقاەۆتىڭ كەزدەسۋى ستراتەگيالىق ارىپتەستىكتى نىعايتۋدىڭ ماڭىزدى قادامى بولدى. الايدا ءار باسىلىم ءوز قىرىنان كورسەتتى: Xinhua — سيمۆولدىق ساباقتاستىق تۇرعىسىنان, CGTN — ناقتى جەتىستىكتەر تۇرعىسىنان, ال gov.cn مەن قىتاي ءسىم — ۇستامدى ديپلوماتيالىق ءتىل ارقىلى.
