ماقالادا مەملەكەت باسشىسى قازاق-قىتاي قاتىناستارىنىڭ تاريحي تامىرىنا توقتالىپ, عاسىرلار بويى جالعاسىپ كەلە جاتقان تاتۋ كورشىلىك قارىم-قاتىناستىڭ بۇگىنگى تاڭدا جان-جاقتى ستراتەگيالىق سەرىكتەستىككە اينالعانىن ايتتى.
«عاسىرلاردان تامىر تارتاتىن قازاق پەن قىتايدىڭ تاتۋ كورشىلىك قارىم-قاتىناسى ءوزارا سەنىم, قولداۋ مەن تۇسىنىستىككە ارقا سۇيەيدى. بۇگىنگى تاڭدا وسىناۋ بەرىك دوستىق بايلانىستارىمىز ستراتەگيالىق سەرىكتەستىك پەن مەملەكەتارالىق ىنتىماقتاستىقتىڭ ۇلگىسىنە اينالدى», – دەدى ق.توقاەۆ.
پرەزيدەنتتىڭ ايتۋىنشا, ەكى ەلدى بەيبىتشىلىك پەن تاتۋ كورشىلىكتىڭ سيمۆولىنا اينالعان 1700 شاقىرىم ورتاق شەكارا بىرىكتىرەدى.
«بۇل تەك گەوگرافيالىق شەكارا ەمەس, سونىمەن بىرگە حالىقتارىمىزدىڭ اراسىنداعى سەنىمنىڭ, دوستىقتىڭ جانە ءوزارا تۇسىنىستىكتىڭ نىشانى», – دەپ اتاپ ءوتتى ول.
ماقالادا قىتاي باسشىسى سي ءتسزينپيننىڭ كورەگەن باسشىلىعىمەن قول جەتكىزىلگەن تابىستارعا دا توقتالىندى.
«قىتاي الەمدىك دەڭگەيدەگى كورنەكتى ساياساتكەر سانالاتىن توراعا سي ءتسزينپيننىڭ ساليقالى باسشىلىعىمەن تاڭعالارلىق تابىستارعا قول جەتكىزدى. بۇل تابىستار جاقىن كورشىلەرىنە, سونىڭ ىشىندە قازاقستانعا دا جاڭا مۇمكىندىكتەر ەسىگىن ايقارا اشتى», – دەپ جازدى توقاەۆ.
سونداي-اق پرەزيدەنت قوس ەلدىڭ قازىرگى سەرىكتەستىگى ۋاقىت سىنىنان وتكەنىن, ال بولاشاقتا ودان ءارى نىعايا تۇسەتىنىنە سەنىم ءبىلدىردى.
«بولاشاعىنان كوپ ءۇمىت كۇتتىرەتىن جاڭا كەزەڭگە قادام باسقان كەزدە ۋاقىت تەزىنەن وتكەن سەرىكتەستىگىمىزدىڭ قانشالىقتى مىقتى ءارى تەرەڭ ەكەنىن ءتۇيسىنۋ وتە ماڭىزدى», – دەدى مەملەكەت باسشىسى.
ول قازاقستان مەن قىتايدىڭ تەك ەكونوميكادا عانا ەمەس, ساياسي جانە مادەني سالالاردا دا بايلانىستارى ارتىپ وتىرعانىن اتاپ ءوتتى.
«ورتاق مۇرات پەن بارلىق باعىتتاعى ىنتىماقتاستىقتى كەڭەيتۋ ارقىلى سوڭعى جىلدارى ءوزارا ىقپالداستىعىمىز ەرەكشە قارقىن الدى. بۇل – ءبىزدىڭ ەلدەرىمىزدىڭ اراسىنداعى سەنىمدى سەرىكتەستىكتىڭ ناتيجەسى», – دەدى توقاەۆ.
