قورعانبەك امانجول – قازاق پوەزياسىنا سۇبەلى ۇلەس قوسىپ, جەمىستى ەڭبەك ەتىپ كەلە جاتقان بەلگىلى اقىن. قالامگەردىڭ قالامىنان ءار جىلدارى «زەرەندى قاراعايلارى», «سابات», «مەشىتتى عالام», ء«بىرالى-داستان», «جىرلايمىن كوكشەتاۋىمدى», «الاپا» سىندى جىر جيناقتارى تۋدى. سونداي-اق قازاق تاريحىنىڭ كوپكە بەلگىسىز قاتپارلارىنان ارشىپ, تۇلعالاردى تانىتقان «قاناي-ابىلاي», «ولجاس», «حان كەنە. ارلان-شاماي» سىندى پوەمالار جازدى. اۆتوردىڭ «زۇلمات پەن عيبرات», ء«بىرجان بۇرمالارى», «اقىرەتتىك امانات», «قىزىل سىزىق» جانە «ايسبەرگ استىنداعى اعىستار», ت.ب باسقا دا تاريحي, ادەبي ەسسە كىتاپتارى وقىرمان ىقىلاسىنا بولەنگەن.
قورعانبەك عالىمتاي ۇلى الەمدىك كلاسسيكا – گەرمان مەللۆيلدىڭ «موبي ديك نەمەسە اق كيت» رومانىن جانە «نوۆەللا حانزاداسى» اتانعان گرۋزين جازۋشىسى گيۆي سيحارۋليدزەنىڭ «ويىپ جازدىم اتىمدى» اتتى اڭگىمەلەر جيناعىن انا تىلىمىزدە سويلەتىپ, قازاق وقىرمانىنا ۇسىندى. سونىمەن قاتار و.جانايداروۆتىڭ «ەجەلگى قازاقستان ميفتەرى», «ەجەلگى قازاقستان اڭىزدارى», «ەجەلگى قازاقستان ءاپسانالارى» اتتى تاريحي-تانىمدىق كىتاپتارىن قازاق تىلىنە تارجىمەلەدى.
«الاش» ادەبي سىيلىعىنىڭ لاۋرەاتى «Egemen Qazaqstan» گازەتىنىڭ ارداگەر ءجۋرناليسى قورعانبەك امانجولدىڭ «سىرۇيىق» اتتى بۇل كىتابىنا نەگىزىنەن كەيىنگى بەس-التى جىل بەدەرىندە شىنايى شابىتتان تۋعان ورنەكتى ولەڭدەرى مەن كورنەكتى پوەمالارى توپتاستىرىلىپتى. ۋاقىت ءھام زامانمەن تىنىسى ءبىر اقىننىڭ رۋحتى جىرلارى تۋعان ەل مەن جەردىڭ جالاۋىن جەلبىرەتىپ, ۇلتىمىزدىڭ جۇرەك شەرىن قوزعايدى. «شەر كەشۋ», «مۇساقۇل بالۋان», ء«جۇز جىل» سىندى داستاندارىندا قازاق تاريحىنىڭ قاتپارلى كەزەڭدەرى كەڭىنەن قامتىلىپ, كوركەم سۋرەتتەلىپ, الاۋلى جىردىڭ ارقاۋىنا اينالعان. وسىناۋ جىر جيناق قورعانبەك اقىننىڭ ولەڭ ولكەسىندە وقىرمان ىقىلاسىنا بولەنەر كەزەكتى بەلەسى بولارىنا سەنەمىز.
