ءىىم مالىمەتىنشە, جامبىل وبلىسىندا 40 جاستاعى جەرگىلىكتى تۇرعىن ۇستالدى. ونىڭ ءۇيىنىڭ اۋلاسىنان تىيىم سالىنعان كەنەپ (كاننابيس) بۇتالارى الىندى. ءۇي ىشىنەن كەپتىرىلمەگەن جانە كەپتىرىلگەن ماريحۋانانىڭ جالپى سالماعى 240 كەلىنى قۇرايتىن 144 ءتۇبى تاركىلەندى.
ۇلىتاۋ وبلىسىندا ەر ادام ۇستالىپ, ودان جالپى سالماعى 20 كەلىدەن اساتىن ماريحۋانا مەن گاشيش تاركىلەندى.
قاراعاندىدا وڭتۇستىك وڭىرلەردەن جەتكىزىلەتىن ەسىرتكى ارناسىنىڭ جولى كەسىلدى. تەمىرجول ۆوكزالى ماڭىندا 75 جاستاعى ازامات ۇستالىپ, ودان شامامەن 10 كەلى گاشيش پەن ماريحۋانا الىندى. سونىمەن قاتار, ونىڭ اۆتوكولىگىن تەكسەرۋ كەزىندە جالپى سالماعى 20 كەلىدەي ەكى بريكەت ماريحۋانا تاركىلەندى.
«بيىل 4 655 قىلمىستىق ەسىرتكى قۇقىقبۇزۋشىلىعىنىڭ جولى كەسىلدى. زاڭسىز اينالىمنان 11 توننادان استام ەسىرتكى الىندى, ونىڭ ىشىندە 1 توننادان استامى سينتەتيكالىق زاتتار. سينتەتيكالىق ونىمدەر دايىندايتىن 11 ناركولابوراتوريا جويىلدى. 24 توننا حيميالىق زات تاركىلەندى, ونىڭ ىشىندە 6 توننادان استام پرەكۋرسور بار. ەسىرتكى جارناماسىن انىقتاۋ جۇمىستارى كۇشەيتىلدى: انىقتالعان قۇقىقبۇزۋشىلىقتار ەكى ەسەگە جۋىق ءوستى, ەسىرتكىنى جارنامالاعانى ءۇشىن 105 سوتقا دەيىنگى تەرگەۋ ءىسى قوزعالدى. 20 مىڭ ينتەرنەت-رەسۋرس — سايتتار, اككاۋنتتار جانە وزگە دە پلاتفورمالار بۇعاتتالدى, ولار ەسىرتكى مەن پسيحوتروپتىق زاتتار جايلى اقپارات تاراتقان», دەدى قر ءىىم ەسىرتكى قىلمىسىنا قارسى ءىس-قيمىل كوميتەتى توراعاسىنىڭ ورىنباسارى قۋاندىق ءالجانوۆ.
