فوتو: اشىق دەرەككوز
بۇل شەشىم وسىنداي قۇرىلعىلاردىڭ ىقتيمال زيانىنا قاتىستى الاڭداۋشىلىقتان تۋىنداعان.
وڭتۇستىك كورەيا ءبىلىم مينيسترلىگىنىڭ مالىمدەۋىنشە, 2025 جىلدىڭ 1 ناۋرىزىنان باستاپ باستاۋىش, ورتا جانە جوعارى سىنىپ وقۋشىلارىنا ساباق كەزىندە سمارتفوندار مەن ۇقساس قۇرىلعىلاردى قولدانۋعا تىيىم سالىنادى.
Yonhap اقپارات اگەنتتىگىنىڭ جازۋىنشا, ەل بيلىگى جاستاردىڭ سمارتفونعا تاۋەلدىلىگىن ازايتۋ ماقساتىندا مەكتەپتەردە مۇنداي قۇرىلعىلاردى پايدالانۋدى شەكتەۋگە تالپىنىپ وتىر.
ايتا كەتسەك, 2023 جىلدىڭ قىركۇيەگىنەن بەرى ءبىلىم مينيسترلىگى ساباق بارىسىندا سمارتفوندار مەن وزگە دە ءپورتاتيۆتى ەلەكتروندىق قۇرىلعىلاردى پايدالانۋعا شەكتەۋلەر ەنگىزىپ كەلگەن. ال جاڭا زاڭعا ەنگىزىلگەن تۇزەتۋلەر بۇل شەكتەۋلەرگە قۇقىقتىق نەگىز قالىپتاستىرۋى ءتيىس.
سونىمەن قاتار جاڭا تىيىمعا بىرقاتار ەرەكشەلىكتەر قاراستىرىلعان. اتاپ ايتقاندا, مۇمكىندىگى شەكتەۋلى وقۋشىلارعا, توتەنشە جاعدايلاردا جانە وقۋ ۇدەرىسىنە قاجەت بولعان جاعدايدا قۇرىلعىلاردى قولدانۋعا رۇقسات بەرىلەدى.
وسىلايشا, وڭتۇستىك كورەيا سىنىپتاردا سمارتفوندار مەن تسيفرلىق قۇرىلعىلاردى پايدالانۋعا شەكتەۋ قويعان ەلدەردىڭ قاتارىنا قوسىلادى.
بۇعان دەيىن حابارلانعانداي, 2025–2026 وقۋ جىلدارىنان باستاپ بەلگياداعى باستاۋىش جانە ورتا مەكتەپتەردە دە ءموبيلدى تەلەفوندار مەن باسقا دا ەلەكتروندىق قۇرىلعىلاردى قولدانۋعا جالپىۇلتتىق تىيىم ەنگىزۋ جوسپارلانعان.
