فوتو: اقوردا
مەملەكەت باسشىسى قازاقستاننىڭ يوردانيامەن ءوزارا ءتيىمدى ىنتىماقتاستىقتى دامىتۋعا ەرەكشە ءمان بەرەتىنىن جەتكىزدى.
«ەكىجاقتى قارىم-قاتىناستى دامىتۋعا دەگەن شىنايى نيەتىڭىزدى جوعارى باعالايمىز. ءسىزدىڭ ساليقالى ءارى سارابدال كوشباسشىلىعىڭىزدى, سونداي-اق ايماقتاعى جانە الەمدەگى بەيبىتشىلىك پەن تۇراقتىلىقتى قامتاماسىز ەتۋدەگى ەرەكشە ءرولىڭىزدى اتاپ وتكىم كەلەدى. ءسىزدىڭ كۇش-جىگەرىڭىزدىڭ ارقاسىندا يوردانيا تاياۋ شىعىستاعى تۇراقتىلىق مەكەنىنە اينالدى. ديالوگ پەن ىقپالداستىقتى باستى باعدار رەتىندە ۇستانۋىڭىزدىڭ ناتيجەسىندە كورولدىكتىڭ حالىقارالىق ارەناداعى ابىروي-بەدەلى ارتتى. بيىل اقپان ايىندا قازاقستان پرەزيدەنتى رەتىندە يوردانيا حاشيميت كورولدىگىنە جاساعان ءبىرىنشى رەسمي ساپارىمدى ەرەكشە ىقىلاسپەن ەسكە الامىن. بۇگىنگى ساپار ەكىجاقتى قاتىناستارعا تىڭ سەرپىن بەرىپ, ىنتىماقتاستىعىمىزدىڭ جاڭا كەزەڭىنە جول اشاتىنىنا سەنىمدىمىن», دەدى پرەزيدەنت.
قاسىم-جومارت توقاەۆتىڭ ايتۋىنشا, قازاقستان مەن يوردانيانى ساياسي جانە ەكونوميكالىق تۇرعىداعى ورتاق مۇددە عانا ەمەس, ءدىن, تولەرانتتىلىق ءداستۇرى جانە ءوزارا قۇرمەت سەكىلدى عاسىرلار بويعى قۇندىلىقتار بىرىكتىرەدى. ەكى ەل الەمگە سان الۋان مادەنيەت پەن كونفەسسياداعى حالىقتاردىڭ تاتۋ-ءتاتتى ءومىر ءسۇرىپ, ادامزات دامۋىنا ۇلەس قوسا الاتىنىن كورسەتتى.
كورول ءىى ابداللا قوس مەملەكەتتىڭ دوستىعىن جوعارى باعالايتىنىن اتاپ ءوتتى.
«بۇگىنگى ساپار ءتۇرلى سالاداعى ىنتىماقتاستىقتى نىعايتۋعا جانە ەكىجاقتى بايلانىستاردى تەرەڭدەتۋگە تاراپتاردىڭ مۇددەلى ەكەنىن راستايدى. بۇعان دەيىنگى كەلىسسوزدەر قورىتىندىسى بويىنشا بىرقاتار ماڭىزدى كەلىسىم مەن مەموراندۋمعا قول قويىلدى. بۇگىنگى ۋاعدالاستىقتار, سونداي-اق ونى تابىستى ىسكە اسىرۋ ەلدەرىمىزدىڭ اراسىنداعى سەرىكتەستىكتى كەڭەيتۋگە بەرىك نەگىز قالايتىنىنا سەنىمدىمىن», دەدى يوردانيا كورولى.
قاسىم-جومارت توقاەۆ اممانداعى كەزدەسۋ بارىسىندا تاراپتار تاۋار اينالىمىن 500 ميلليون دوللارعا دەيىن ۇلعايتۋعا ۋاعدالاسقانىن ەسكە سالدى. قازاقستان يوردانيا نارىعىنا جالپى قۇنى 250 ميلليون دوللار بولاتىن 60 ءونىم ءتۇرىن ەكسپورتتاۋعا دايىن.
پرەزيدەنت «قازاتومونەركاسىپ» ۇلتتىق كومپانياسى مەن يوردانيا ۋران ءوندىرۋشى كومپانياسىنىڭ (JUMCO) اتوم ونەركاسىبىن دامىتۋ سالاسىنداعى ىنتىماقتاستىعىنا قولداۋ ءبىلدىردى.
پرەزيدەنت يوردانيا دەلەگاتسياسىنا ەلىمىزدىڭ حالىقارالىق كولىك-لوگيستيكا جەلىسىن كەڭەيتۋ باستامالارى تۋرالى مالىمەت بەرىپ, ورتالىق ازيا مەن تاياۋ شىعىس اراسىندا ينتەرمودالدى جۇك تاسىمالىن بىرلەسە وركەندەتۋ مۇمكىندىكتەرىن قاراستىرۋدى ۇسىندى.
بۇدان بولەك, اۋىل شارۋاشىلىعى, تۋريزم, تسيفرلاندىرۋ سالالارىنداعى ىقپالداستىقتىڭ الەۋەتى زور.
ءوز كەزەگىندە يوردانيا تاراپى مەديتسينا, فارماتسەۆتيكا, حالال يندۋسترياسى جانە قورعانىس ونەركاسىبى باعىتىنداعى تاجىريبەسىمەن بولىسۋگە نيەتتى.
سونىمەن قاتار Royal Jordanian اۋە كومپانياسى كەلەسى جىلى اممان مەن الماتى اراسىندا تىكەلەي اۋە رەيسىن اشۋدى جوسپارلاپ وتىرعانىن جەتكىزدى. بۇل قادام ەكى ەلدىڭ ازاماتتارى مەن ىسكەرلىك ورتاسىنىڭ بايلانىستارىن جانداندىرادى.
بۇدان بولەك, تاراپتار مادەني-گۋمانيتارلىق ىنتىماقتاستىقتى كەڭەيتۋگە, سونىڭ ىشىندە بىرلەسكەن عىلىمي-زەرتتەۋ جوبالارىن جۇرگىزىپ, ۋنيۆەرسيتەتتەر اراسىندا سەرىكتەستىك ورناتۋعا قىزىعۋشىلىق تانىتتى.
