فوتو: اشىق دەرەككوز
ۆيتسە-پرەمەردىڭ ايتۋىنشا, بولجام ءۇش ستسەناري بويىنشا جاسالعان: بازالىق, قالىپتى جانە بالاما. نەگىزگى نۇسقادا الداعى ون جىل ىشىندە ءجىو-ءنىڭ ورتاشا جىلدىق ءوسىمى 4,5%-دى قۇراپ, 2035 جىلعا قاراي نومينالدى كولەمى 473,2 ترلن تەڭگەگە جەتەدى.
سونداي-اق قۇجاتتا مەملەكەتتىك بيۋدجەت كىرىسى 2035 جىلى 66,8 ترلن تەڭگەگە دەيىن وسەتىنى كورسەتىلگەن. شيكىزات سەكتورىنا تاۋەلدىلىكتى تومەندەتۋ ءۇشىن ۇلتتىق قوردان كەپىلدەندىرىلگەن ترانسفەرت كولەمى 2029 جىلدان باستاپ كەزەڭ-كەزەڭىمەن قىسقارىپ, 2 ترلن تەڭگە دەڭگەيىندە بەلگىلەنەدى.
«2035 جىلى مەملەكەتتىك بيۋدجەتتىڭ كىرىسى 66,8 ترلن تەڭگەگە دەيىن ۇلعايادى. كەپىلدەندىرىلگەن ترانسفەرتتى 2029 جىلدان باستاپ 2 ترلن تەڭگەگە دەيىن تومەندەتۋ كوزدەلگەن. بيۋدجەت تاپشىلىعى 2029 جىلى ءجىو-ءنىڭ 0,4%-عا دەيىن بىرتىندەپ تومەندەۋمەن جانە 2030 جىلدان باستاپ نولدىك دەڭگەيگە جەتۋمەن ايقىندالدى», دەدى سەرىك جۇمانعارين.
