سالتاناتتى ءىس-شاراعا عىلىم جانە جوعارى ءبىلىم ءمينيسترى ساياسات نۇربەك, قىرعىز رەسپۋبليكاسىنىڭ عىلىم, جوعارى ءبىلىم جانە يننوۆاتسيالار ءمينيسترى باكتيار وروزوۆ, ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ, وش مەملەكەتتىك ۋنيۆەرسيتەتىنىڭ رەكتورى قۇدايبەردى قوجوبەكوۆ, سونداي-اق ەكى ەلدىڭ جوعارى ءبىلىم جۇيەسىنىڭ وكىلدەرى قاتىستى.
«بىلتىر قىرعىزستان پرەزيدەنتىنىڭ قازاقستانعا ساپارى اياسىندا ەكى ەلدىڭ جاستارىن جاقىنداستىرا تۇسەتىن بىرقاتار ۋاعدالاستىققا قول جەتكىزگەن ەدىك. سونىڭ ناتيجەسىندە ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ وش قالاسىنداعى فيليالى اشىلىپ وتىر. بۇدان بولەك, قازاقستان ۇكىمەتى قىرعىز ستۋدەنتتەرىنە 50 گرانت ءبولىپ وتىر. كەلەسى جىلدان باستاپ گرانت سانىن 60-قا دەيىن كوبەيتەمىز دەپ شەشتىك», دەپ اتاپ ءوتتى مەملەكەت باسشىسى رەسمي ساپارىنىڭ قورىتىندىسى بويىنشا بەرگەن ءباسپاسوز بريفينگىندە.
ەۇۋ-دىڭ وش مەملەكەتتىك ۋنيۆەرسيتەتىندەگى فيليالى ەكولوگيا, اقپاراتتىق-كوممۋنيكاتسيالىق تەحنولوگيالار جانە قىزمەت كورسەتۋ سالاسى بويىنشا ماماندار دايارلايدى. فيليال بازاسىندا ەكى ەلدىڭ ستۋدەنتتەرى ورىس ءتىلى مەن ادەبيەتى, اۋدارما ءىسى, شەت ءتىلى, جۋرناليستيكا, فيزيكا ماماندىقتارى بويىنشا ءبىلىم الىپ, وقۋىن اياقتاعان سوڭ ەكى ۋنيۆەرسيتەتتىڭ قوس ديپلومىن الادى.
ايتا كەتەيىك, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى اكادەميالىق ۇتقىرلىق جانە قوس ديپلومدىق ءبىلىم بەرۋ باعدارلامالارى بويىنشا قىرعىز رەسپۋبليكاسىنىڭ 16 ۋنيۆەرسيتەتىمەن ىنتىماقتاسادى.
