فوتو: aqtobegazeti.kz
نەگىزگى اۆتوجولداردى رەكونسترۋكتسيالاۋ جۇمىستارىن اياقتاۋ جانە تسيفرلاندىرۋ
2024 جىلدىڭ ناۋرىز ايىندا «ادال ادام – ادال ەڭبەك – ادال تابىس» ۇلتتىق قۇرىلتاي وتىرىسىندا پرەزيدەنت قاسىم-جومارت توقاەۆ كەمىندە 12 مىڭ شاقىرىم اۆتوجولدى رەكونسترۋكتسيالاۋ جانە جوندەۋدەن وتكىزۋدى تاپسىرعان بولاتىن.
2024 جىلدىڭ قورىتىندىسى بويىنشا قويىلعان مىندەتتەردى ورىنداۋ شەڭبەرىندە 12 مىڭ شاقىرىم جولعا قۇرىلىس, جوندەۋ جانە رەكونسترۋكتسيالاۋ جۇمىستارى جۇرگىزىلگەن. ونىڭ 7 مىڭ شاقىرىمىندا نەگىزگى جۇمىستار اياقتالعان. جوباعا 10 مىڭنان استام تەحنيكا مەن 25 مىڭ مامان قاتىسقان. ناتيجەسىندە, رەسپۋبليكالىق ماڭىزى بار جولداردىڭ قالىپتى جاعدايى 93%-عا, ال جەرگىلىكتى جولداردىڭ نورماتيۆتىك جاعدايى 89%-عا دەيىن جاقساردى.
نەگىزگى باسىمدىقتاردىڭ ءبىرى ستراتەگيالىق ماڭىزى بار ءتورت اۆتوموبيل جولىن رەكونسترۋكتسيالاۋ جۇمىستارىن اياقتاۋ بولدى:
«قاراعاندى – الماتى» (885 كم): ءتورت جولاقتى, زاماناۋي توسقاۋىل قورشاۋلارى جانە تولىق جارىقتاندىرۋ ارقىلى ءبىرىنشى تەحنيكالىق ساناتقا دەيىن رەكونسترۋكتسيالاۋ جۇمىسى اياقتالدى. جوبا اياسىندا 33 كوپىر, 48 وتكەل سالىنىپ, سونداي-اق 700 سۋ وتكىزگىش قۇبىر ورناتىلدى.
«تالدىقورعان – وسكەمەن» (768 كم): جول I–II تەحنيكالىق ساناتقا دەيىن قايتا جاڭارتىلدى. قۇرىلىس بارىسىندا جاڭا كوپىرلەر, جول ايرىقتارى مەن سۋ وتكىزۋ قۇرىلىستارى پايدا بولدى, بۇل اباي, شىعىس قازاقستان جانە جەتىسۋ وبلىستارى اراسىنداعى قوزعالىس قاۋىپسىزدىگى مەن جايلىلىعىن ەداۋىر ارتتىردى.
«اتىراۋ – استراحان» (212 كم): قازاقستاندى رەسەي فەدەراتسياسىمەن بايلانىستىراتىن بۇل ماڭىزدى كولىك باعىتى II ساناتقا جاڭارتىلدى. جولدىڭ بارلىق ۇزىندىعىنا 6 كوپىر, 1 وتپە جول, 60 وتكىزۋ قۇرىلىسى جانە دەمالىس ورىندارى سالىندى.
«اقتوبە – قاندىاعاش» (96 كم): رەكونسترۋكتسيالاۋ جولدىڭ ءتورت قوزعالىس جولاعىمەن I–II ساناتقا دەيىن جاقسارۋىنا اكەلدى. جۇمىس اياسىندا 700 مىڭ تونناعا جۋىق اسفالت-بەتون قوسپاسى توسەلىپ, 10 كوپىر, 5 جول وتپەسى جانە 3 جول ايرىعى سالىندى.
بيىل قۇرىلىس-جوندەۋ جۇمىستارى 13 مىڭ شاقىرىمنان استام جولدى قامتىعان. ونىڭ 7 مىڭ شاقىرىمىندا ورتاشا جوندەۋ جۇمىستارى جۇرگىزىلىپ جاتىر. «جەزقازعان – پەتروپاۆل», «مۇقىر – قۇلسارى», «ورال – اتىراۋ» جانە باسقا دا اۆتوجولدار قامتىلدى, «ورتالىق – باتىس» اۆتوجولىنىڭ, سونداي-اق «اقتوبە – ۇلعايسىن», «قاراعاندى – جەزقازعان» ۋچاسكەلەرىنىڭ, سارىاعاش, رۋدنىي جانە شىمكەنت اينالما جولدارىنىڭ قۇرىلىسى باستالدى. «قالباتاۋ – مايقاپشاعاي» جولى اياقتالادى.
«جۇك كولىكتەرىنىڭ شامادان تىس جۇكتەمەسىن باقىلاۋ ءۇشىن 2025 جىلدىڭ اياعىنا دەيىن 220 اۆتوماتتاندىرىلعان ولشەۋ ستانساسى ورناتىلادى. تسيفرلاندىرۋعا ايرىقشا كوڭىل بولىنۋدە. ەلەكتروندى بيلەتتەر, تسيفرلىق ديسپەتچەر قىزمەتى, الدىن الا تەحنيكالىق قىزمەت كورسەتۋ, ينتەللەكتۋالدى كولىك جۇيەلەرى ەنگىزىلىپ جاتىر», دەدى كولىك ۆيتسە-ءمينيسترى ماقسات قالياقپاروۆ.
