بيىل فورۋم شىعارماشىل جاستار اراسىنداعى تسيفرلىق جانە يننوۆاتسيالىق ىنتىماقتاستىقتى دامىتۋعا ارنالدى.
جيىن قوس حالىقتىڭ تاريحى مەن مادەنيەتىن زەرتتەۋدەگى شوقان ءۋاليحانوۆتىڭ ەڭبەگى تۋرالى «چوكان ۆاليحانوۆ: تارىحتىن جارىك جىلدىزى» اتتى دەرەكتى ءفيلمىنىڭ تۇساۋكەسەرىنەن باستالدى.
ءىس-شاراعا قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالاەۆا, قىرعىز رەسپۋبليكاسىنىڭ مەملەكەتتىك حاتشىسى مارات يمانقۇلوۆ, سونداي-اق ەكى ەلدىڭ مادەنيەت, عىلىم جانە شىعارماشىلىق سالاسىنىڭ وكىلدەرى مەن زيالى قاۋىم قاتىستى.
ايدا بالاەۆا شوقان ءۋاليحانوۆ ەڭبەكتەرىنىڭ قازاق-قىرعىز تاريحىنداعى ورنىن ەرەكشە اتاپ ءوتتى.
«الەمگە ايگىلى «ماناس» داستانى قىرعىز ۇلتىنىڭ بويتۇمارى بولسا, ونى العاش رەت قاعازعا ءتۇسىرىپ, كوپكە ناسيحاتتاۋدا شوقان ءۋاليحانوۆتىڭ ەڭبەگى زور. سونداي-اق ونىڭ «ىستىقكول كۇندەلىگىن» – قازاق-قىرعىز بىرلىگىنىڭ عىلىم مەن رۋحانياتتاعى جارقىن كورىنىسى. قىرعىز باۋىرلارىمىز تۇسىرگەن بۇگىنگى «چوكان ۆاليحانوۆ: تارىحتىن جارىك جىلدىزى» دەرەكتى ءفيلمى تاريحي ءارى مادەني قۇندىلىعى زور, ماعىنالى تۋىندى بولادى دەپ سەنەمىن», - دەدى مينيستر.
قىرعىز رەسپۋبليكاسىنىڭ مەملەكەتتىك حاتشىسى مارات يمانقۇلوۆ ەكى ەلگە ورتاق تاريحي تۇلعالاردىڭ ماڭىزىنا توقتالدى.
«قىرعىزستان مەن قازاقستان تاريحىندا اباي قۇنانباەۆ, شوقان ءۋاليحانوۆ, جامبىل جاباەۆ, مۇحتار اۋەزوۆ, شىڭعىس ايتماتوۆ سىندى ۇلى تۇلعالار بار. ولار مادەني جانە رۋحاني داستۇرلەر ارقىلى قوس حالىقتىڭ بىرلىگى مەن باۋىرلاستىعىنا زور ۇلەس قوستى. ءدال وسى قايراتكەرلەر بۇگىنگى جاستارعا شابىت بەرىپ, ولاردى جاسامپازدىق جولىن جالعاستىرۋعا جەتەلەپ كەلەدى», – دەدى ول.
فورۋم اياسىندا قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالاەۆا قىرعىز رەسپۋبليكاسىنىڭ مادەنيەت, اقپارات جانە جاستار ساياساتى ءمينيسترى ميربەك مامبەتاليەۆپەن كەزدەسىپ, مادەني-گۋمانيتارلىق ارىپتەستىكتى دامىتۋ ماسەلەلەرىن تالقىلادى.
بۇدان بولەك, فورۋم كرەتيۆتى يندۋستريا مەن تسيفرلاندىرۋ ماسەلەلەرىنە نازار اۋداردى. «جاڭا بۋىن AI-ستارتاپتارى: جەرگىلىكتى يدەيادان جاھاندىق نارىققا» جانە «Ed-tech جوبالارى: جاڭا سىن-قاتەرلەر» تاقىرىپتارىندا پانەلدىك سەسسيالار وتكىزىلدى. وعان 300-دەن استام جاس IT-كاسىپكەرلەر, ستارتاپشىلار, باعدارلاماشىلار, بلوگەرلەر مەن مەديا ماماندار قاتىستى.
مەملەكەت باسشىسىنىڭ قىرعىز رەسپۋبليكاسىنا رەسمي ساپارى اياسىندا بىشكەكتە قازاقستاننىڭ مادەنيەت كۇندەرى وتكىزىلۋدە. ونىڭ اياسىندا «قازاقستان كينوسى كۇندەرى» ۇيىمداستىرىلىپ, نۇرعيسا تىلەنديەۆتىڭ 100 جىلدىعىنا ارنالعان مەرەكەلىك كونتسەرت ۇسىنىلدى.
