ۆيتسە-پرەمەر قانات بوزىمباەۆتىڭ توراعالىعىمەن وتكەن كەڭەستە مەملەكەت باسشىسىنىڭ حالىقتى 100 پايىز اۋىزسۋمەن قامتاماسىز ەتۋ جونىندەگى تاپسىرماسىن ورىنداۋ بارىسى تالقىلاندى. جيىنعا سالالىق مينيسترلىكتەردىڭ جانە ءوڭىر اكىمدىكتەرىنىڭ باسشىلارى قاتىستى.
مينيسترلىك مالىمەتىنە سايكەس, سۋ رەسۋرستارى جانە يرريگاتسيا مينيسترلىگى تاپسىرىس بەرۋشى رەتىندە بيىل 20 جوبانى ىسكە اسىرۋدا. ونىڭ سەگىزىن جىل سوڭىنا دەيىن اياقتاۋ جوسپارلانعان. ناتيجەسىندە 149 اۋىلداعى جاعداي جاقسارىپ, ءتورت ەلدى مەكەننىڭ 1,5 مىڭ تۇرعىنى العاش رەت ورتالىقتاندىرىلعان سۋعا قوسىلادى. سونداي-اق بيىل 49 اۋىلعا (40 مىڭنان استام تۇرعىنعا) سۋ جۇيەسى تارتىلادى.
قازىر سولتۇستىك قازاقستان, الماتى جانە اقمولا وبلىستارىندا تاعى التى جوبانىڭ جوبالىق-سمەتالىق قۇجاتتاماسى ازىرلەنىپ جاتىر.
ۆيتسە-پرەمەر قانات بوزىمباەۆ اتقارىلعان جۇمىستاردىڭ قارقىنىن سىنعا الىپ, كەيبىر وڭىرلەردىڭ ارتتا قالعانىن اتاپ ءوتتى. ونىڭ ايتۋىنشا, جالپى ەل بويىنشا 269 جوبا قولعا الىنعانىمەن, بىرقاتارى نەبارى 50 پايىز عانا ورىندالعان.
«اباي, اقمولا, قاراعاندى, پاۆلودار, سولتۇستىك قازاقستان, تۇركىستان وبلىستارىندا جانە الماتى قالاسىندا ارتتا قالۋ بايقالادى. اباي وبلىسىندا جەتى جوبا, ونىڭ ىشىندە سەمەيدەگى ءۇش نىسان بويىنشا جۇمىس ءالى باستالعان جوق. الدا ەكى ايدان كەيىن سۋىق تۇسەدى. كەلەر جىلعا وتەتىن جوبا بولماۋى ءتيىس. بارلىق نىسان بيىلعى جىلى تولىق تاپسىرىلۋى قاجەت. بۇل ماسەلە مەنىڭ جەكە باقىلاۋىمدا», دەدى بوزىمباەۆ.
كەڭەس قورىتىندىسى بويىنشا ۇكىمەت مينيسترلىكتەرگە تۇراقتى مونيتورينگ جۇرگىزۋدى تاپسىردى. ال اكىمدىكتەرگە جەرگىلىكتى بيۋدجەت ەسەبىنەن قارجىلاندىرۋدى قامتاماسىز ەتىپ, بيىل جوسپارلانعان بارلىق نىساندى ۋاقىتىلى پايدالانۋعا بەرۋدى مىندەتتەدى.
