الماتى-قوناەۆ تاس جولىنىڭ قاشىقتىعى – 42 شاقىرىم, وبلىستىڭ تۋريستىك نىساندارىن قولجەتىمدى ەتەتىن ماڭىزدى كولىك تورابى. وسى باعىت ارقىلى قاپشاعايعا, ودان ءارى الاكول دەمالىس ورنىنا باراتىن تۋريستەر سانى جىل سايىن ارتىپ كەلەدى. بيىل قاپشاعاي سۋقويماسىنا دەمالىس ماۋسىمىنىڭ باسىنان بەرى 860 مىڭ تۋريست دەمالۋعا بارسا, ال ماۋسىم سوڭىندا 1,6 ملن ادامعا جەتەدى دەگەن بولجام بار.
رەسپۋبليكالىق ماڭىزى بار جولداردىڭ ساپاسى ارتقان سايىن جولاۋشىلار اعىنى دا ەسەلەنە تۇسكەن. الماتى-قوناەۆ تاس جولىندا تاۋلىگىنە 30 مىڭعا جۋىق, ال دەمالىس كۇندەرى 50 مىڭنان اسا كولىك جۇرەدى. بۇل – الماتى وبلىسىنداعى ەڭ قارقىندى, قوزعالىس جىل بويى توقتامايتىن بەلسەندى باعىتتىڭ ءبىرى.
«الماتى-قوناەۆ» اقىلى تاس جولى ەكى باعىتتى, ءۇش جولاقتى. وندا كولىك يەلەرى جولاقىسىن تولەۋگە ارنالعان 12 تەرمينال ىسكە قوسىلعان. ءاربىر تەرمينالدا وتىرعان وپەراتورلار جولاۋشىلارعا تولەم جاساۋ, جول باعىتىنا قاتىستى كەڭەس بەرەدى. مۇنداعى ماماندار جولاقىسىن دەر كەزىندە تولەمەسە, كەپتەلىس تۋىندايتىنىن ايتادى.
«كولىك تىزگىندەگەن ءاربىر جۇرگىزۋشى جولعا شىعار الدىندا جولاقىسىن تولەۋ قاجەتتىگىن ۇمىتپاعان ابزال. جولاقىسىن تولەمەگەن جولاۋشىلار تەرمينالعا كەلگەندە تولەم جاساپ, ۋاقىت الادى. سونىڭ كەسىرىنەن كەپتەلىس بولادى», دەيدى «كاجسەرۆيس» جشس ينجەنەر-ارحيتەكتورى داۋرەن زاكيروۆ.
الماتى-قوناەۆ تاس جولىندا جولاۋشىلار ءۇشىن جول بويىنا ۇلتتىق ستاندارتقا ساي جانارماي بەكەتتەرى اشىلعان. تۋريست اعىنى وسكەن سايىن ونداي كەشەندەرگە دەگەن سۇرانىس ارتىپ كەلەدى. ماماندار مۇنداي كەشەندەردىڭ ستاندارتقا ساي ءاربىر 25 شاقىرىم سايىن ورنالاسۋ قاجەتتىگىن اتاپ ايتتى.
جەرگىلىكتى بيلىك وكىلدەرىنىڭ ايتۋىنشا, قاپشاعايعا دەمالۋشىلاردىڭ ارتۋىنا تەگىس جولدار وڭ ىقپال ەتىپ جاتىر.
«دەمالىس ماۋسىمى اياقتالعانعا دەيىنگى ەسەپ بويىنشا قاپشاعايعا شامامەن 1 ملن 600 مىڭ ادام كەلۋگە ءتيىس. ونىڭ ىشىندە شەتەلدىك جانە ىشكى تۋريستەر دە بار. الماتى اگلومەراتسياسى ماڭايىنداعى تۇرعىندار دا وسى جەردە دەمالادى. جول ساپاسى وسى تۋريستىك اعىننىڭ ارتۋىنا تىكەلەي بايلانىستى», دەيدى الماتى وبلىسى تۋريزم باسقارماسى ءبولىمىنىڭ باسشىسى شەرحان ەسەنتەمىروۆ.
الماتى وبلىسى
