فوتو: ۇكىمەت, تەلەگرام
ول مينيسترلىك تەمىرجول سالاسىن تسيفرلاندىرۋدىڭ بەس باعىتىن ىسكە اسىرۋدا ەكەنىن اتاپ ءوتتى. ءبىرىنشىسى – مەملەكەتتىك قىزمەتتەردى ەلەكتروندىق فورماتقا كوشىرۋ. ەكىنشىسى – تاسىمالداردىڭ اشىقتىعى مەن تيىمدىلىگىن ارتتىرۋ ءۇشىن بيزنەس-پروتسەستەردى رەينجينيرينگتەۋ. ءۇشىنشىسى – يننوۆاتسيالىق ەكوجۇيە قۇرۋ جانە تسيفرلىق تەحنولوگيالاردى ەنگىزۋ. ءتورتىنشىسى – جولاۋشىلاردى OneWeb جانە Starlink سپۋتنيكتىك ينتەرنەتىمەن قامتاماسىز ەتۋ. بەسىنشىسى – ترانزيتتىك تاسىمالداردى ونلاين باقىلاۋ جۇيەسىن ەنگىزۋ.
«2024 جىلى سالادا 5 مەملەكەتتىك قىزمەت قولجەتىمدى بولدى. ولاردىڭ بارلىعى ەلەكتروندىق فورماتتا كورسەتىلدى. بيىل ءتىزىلىم «قاۋىپسىزدىك سەرتيفيكاتىن بەرۋ» اتتى جاڭا قىزمەت تۇرىمەن تولىقتىرىلدى. ءبىر جىل ىشىندە 28 مىڭنان استام مەملەكەتتىك قىزمەت كورسەتىلدى. ونىڭ 99%-ى ونلاين فورماتتا ۇسىنىلعان», دەدى جاسلان ماديەۆ.
جيىندا تسيفرلىق تەحنولوگيالاردى ەنگىزۋ تاسىمالدىڭ تيىمدىلىگىن ارتتىراتىنى اتالىپ ءوتتى. سالاعا كەلەسىدەي تسيفرلىق شەشىمدەر ەنگىزىلىپ جاتىر. ولار – ماگيسترالدىق جەلىنىڭ تسيفرلىق قوسارلانعان مودەلىن جاساۋ, تاسىمالداردى جوسپارلاۋ ءۇشىن جاساندى ينتەللەكت ەنگىزۋ, ۆاگون نومىرلەرىن بەينە ارقىلى تانۋ جانە «ۆاگون/جۇك ورنىن انىقتاۋ» قىزمەتىن قوسۋ, كەلۋ/كەتۋ دەرەگىن انىقتاۋ ءۇشىن GPS-ترەكەرلەردەن دەرەكتەردى اۆتوماتتى تۇردە قابىلداۋ جۇيەسىنە جىبەرۋ, ۆاگون ءنومىرىن تىركەۋ ارقىلى توقتاپ تۇرۋ ۋاقىتىن اۆتوماتتى ەسەپتەۋ. اتالعان شەشىمدەر جۇمىس ساتىلارىن 45%-عا, ال بيزنەس-رولدەردى 35%-عا قىسقارتادى. باسقارۋ وڭاي ءارى اشىق بولادى.
