فوتو: اقوردا
«بۇگىننەن باستاپ اقوردا رەسمي جاڭالىقتارىن Aitu ۇلتتىق مەسسەندجەرىنەن دە وقي الاسىزدار», دەلىنگەن حابارلامادا.
ارناعا سىلتەمە: @aqorda_official
ايتا كەتەيىك, پرەزيدەنت قاسىم-جومارت توقاەۆ جاساندى ينتەللەكت دامۋىنا بايلانىستى جاڭا قاۋىپتەر پايدا بولعانىن ايتىپ, دەرەكتەردى باسقارۋ مەن كيبەرقاۋىپسىزدىكتى كۇشەيتۋ ماقساتىندا ۇكىمەتكە جەكە دەرەكتەردى قولداناتىن بارلىق كوممۋنيكاتسيانى قورعالعان ۇلتتىق مەسسەندجەرگە كوشىرۋ ماسەلەسىن پىسىقتاۋدى تاپسىرعان بولاتىن.
«بۇل پلاتفورمالاردا جەكە سايكەستەندىرۋ ءنومىرىن, ازاماتتاردىڭ دەنساۋلىعى تۋرالى مالىمەتتى جانە باسقا دا دەرەكتەردى ءجيى سۇرايدى. مۇنداي تاجىريبە جەكە مالىمەتتەردى قورعاۋ تۋرالى زاڭناماعا قايشى جانە ۇلتتىق يۋريسديكتسيادان تىسقارى جەرگە دەرەكتەردىڭ تاراپ كەتۋىنە اكەلىپ سوعادى. قازاقستاندا وتاندىق Aitu مەسسەندجەرى ازىرلەندى. ول ءتيىستى قاۋىپسىزدىك دەڭگەيىن قامتاماسىز ەتە الادى. ۇكىمەت جەكە دەرەكتەردى قولداناتىن بارلىق كوممۋنيكاتسيانى قورعالعان ۇلتتىق مەسسەندجەرگە كوشىرۋ ماسەلەسىن پىسىقتاۋى كەرەك», دەدى قاسىم-جومارت توقاەۆ.
سونداي-اق, ۇكىمەتتە وتكەن تسيفرلىق شتاب وتىرىسىندا AITU ۇلتتىق مەسسەندجەرىن كەڭ اۋقىمدا ەنگىزۋ ماسەلەسى قارالعان بولاتىن. ونىڭ پيلوتتىق جۇمىسى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىندە كورسەتىلدى, ەندى اتالعان قىزمەت مەملەكەتتىك ورگاندار مەن كۆازيمەملەكەتتىك سەكتور ۇيىمدارىنىڭ بارلىعىنا ەنگىزىلەدى. مەسسەندجەرگە كوشۋ مەرزىمى 15 قىركۇيەككە دەيىن بەكىتىلدى.
