فوتو: ۇكىمەت
تەمىرجول ونەركاسىبى ەلىمىزدەگى ماشينا جاساۋدىڭ جالپى كولەمىنىڭ 13%-ىن قۇراپ وتىر. وتكەن جىلى تەمىرجول ونىمدەرىن شىعارۋ 25%-عا ءوسىپ, 600 ميلليارد تەڭگەگە جەتكەن.
«كەيىنگى بەس جىلدا ۇلتتىق وپەراتوردىڭ ۆاگون پاركىن جاڭارتۋدى ىسكە اسىرۋ ناتيجەسىندە وسى سالادا ينۆەستيتسيالىق بەلسەندىلىك بايقالىپ جاتىر. ناتيجەسىندە وتاندىق نارىققا Wabtec, Alstom, Stadler سياقتى الەمنىڭ جەتەكشى برەندتەرى كەلدى», دەدى مينيستر.
بۇگىندە سالاداعى 60-تان استام كاسىپورىندا, 8 مىڭعا جۋىق ادام جۇمىس ىستەيدى.
سونداي-اق, قازاقستان تەمىرجول تەحنيكالارى مەن وعان ارنالعان بولشەكتەردى شىعارۋ ءوندىرىسىن ارتتىرىپ كەلەدى.
جاڭا وندىرىستىك ورىندار استانا, ەكىباستۇز, سەمەي قالالارىندا جانە اتىراۋ وبلىسىندا قۇرىلىپ جاتىر. ماسەلەن, بيىل قاڭتار ايىندا استانادا جىلىنا جۇزگە دەيىن جولاۋشىلار ۆاگونىن شىعاراتىن «Stadler قازاقستان» زاۋىتى, اتىراۋ وبلىسىندا «تەكسول ترانس» جشس-نىڭ جىلىنا 6 مىڭ جۇك ۆاگونى مەن تسيستەرنا شىعاراتىن زاۋىتى ىسكە قوسىلدى
«شىعارىلعان ۆاگوندار 2030 جىلعا دەيىن كەلىسىم-شارت اياسىندا «قازاقستان تەمىر جولى» ۇلتتىق كومپانياسىنا جەتكىزىلەتىن بولادى. جىل سوڭىنا دەيىن العاشقى 51 ۆاگون پايدالانۋعا بەرىلەدى. اتىراۋدا جەرگىلىكتى ءوندىرىس ۇلەسىن ارتتىرۋ ماقساتىندا ينۆەستور بولشەك قۇيۋ زاۋىتىن سالۋدى باستادى. وندا جىلىنا 60 مىڭ تونناعا دەيىن دەتالدار قۇيىلماق. زاۋىتتىڭ ىسكە قوسىلۋى 2027 جىلعا جوسپارلانعان», دەدى ەرسايىن ناعاسپاەۆ.
