كەزدەسۋدىڭ قورىتىندىسىندا قوس تاراپ قازاقستان رەسپۋبليكاسى پارلامەنتىنىڭ سەناتى مەن وزبەكستان رەسپۋبليكاسى ولي ءماجىلىسىنىڭ سەناتى اراسىنداعى ىنتىماقتاستىقتى دامىتۋعا ارنالعان 2025–2026 جىلدارعا ارنالعان جول كارتاسىنا قول قويدى.
ماۋلەن اشىمباەۆ تانزيلا نارباەۆاعا ءىلتيپات ءبىلدىرىپ, وزبەكستان دەلەگاتسياسىن كەلە جاتقان تاۋەلسىزدىك كۇنىمەن قۇتتىقتادى. ول ەكى ەلدىڭ اراسىنداعى باۋىرلاستىق, دوستىق جانە تاتۋ كورشىلىك ءداستۇرىنىڭ ماڭىزىن اتاپ ءوتتى. سپيكەردىڭ ايتۋىنشا, مەملەكەت باسشىلارى ايقىنداعان ءوزارا ءىس-قيمىلدىڭ جوعارى قارقىنىن جالعاستىرۋ, ورنىقتى بولاشاققا قول جەتكىزۋ جانە ورتالىق ازيانىڭ ورتاق مىندەتتەرىن ىسكە اسىرۋ جولىندا بىرلەسكەن ارەكەت قاجەت.
ء«بىزدىڭ ەلدەرىمىز اراسىندا بارلىق دەڭگەيدە تىعىز ساياسي قارىم-قاتىناس ورناعان. ەكونوميكالىق ىنتىماقتاستىق بەلسەندى دامىپ, مادەني-گۋمانيتارلىق بايلانىستار دا نىعايىپ كەلەدى. بۇل – ەڭ الدىمەن, مەملەكەتتەرىمىزدىڭ باسشىلارى قاسىم-جومارت كەمەل ۇلى توقاەۆ پەن شاۆكات ميرامونوۆيچ ميرزيەەۆتىڭ بەرىك دوستىعى مەن ءوزارا سەنىمگە نەگىزدەلگەن قارىم-قاتىناسىنىڭ ناتيجەسى. جوعارى دەڭگەيدەگى تۇراقتى كەزدەسۋلەر بارىسىندا ماڭىزدى كەلىسىمدەرگە قول جەتكىزىلدى. مىسالى, بىلتىر وزبەكستان پرەزيدەنتىنىڭ قازاقستانعا جاساعان مەملەكەتتىك ساپارى كەزىندە الداعى 10 جىلعا ارنالعان ستراتەگيالىق سەرىكتەستىك پەن ىنتىماقتاستىق باعدارلاماسى قابىلداندى. ءبىز ءۇشىن سول كەلىسىمدەردى ءتيىمدى ىسكە اسىرۋ – باستى مىندەت», – دەدى ماۋلەن اشىمباەۆ.
وسى رەتتە ول كەلەسى جىلى الماتىدا وتەتىن وڭىرلىك كليماتتىق ءسامميتتىڭ كۇن تارتىبىنە دە توقتالدى. كەزدەسۋدە تاراپتار قازاقستان مەن وزبەكستان پارلامەنتتەرىنىڭ پالاتالارى اراسىنداعى ىنتىماقتاستىق جونىندەگى كوميسسيا جۇمىسىنىڭ ناتيجەلەرىن قاراستىردى. سونىمەن قاتار ورتالىق ازيا مەملەكەتتەرى پارلامەنتارالىق فورۋمىنىڭ اياسىندا ايماقتىڭ ساياسي, ەكونوميكالىق جانە مادەني الەۋەتىن ءتيىمدى پايدالانۋ ماسەلەلەرى تالقىلاندى.
«ەلدەرىمىز اراسىندا پارلامەنتارالىق ىنتىماقتاستىقتى دامىتۋدىڭ ماڭىزى زور. بۇگىن قابىلدانعان جول كارتاسى زاڭ شىعارۋ تاجىريبەسىمەن الماسۋدى جانداندىرىپ, بىرلەسكەن ءىس-شارالار مەن كونسۋلتاتسيالاردى ۇيىمداستىرۋعا, كوميتەتتەر مەن اپپاراتتار اراسىنداعى ءوزارا ءىس-قيمىلدى كۇشەيتۋگە جول اشادى», – دەدى سەنات توراعاسى.
سۇحباتتا سۋ-ەنەرگەتيكا, كولىك-لوگيستيكا, ەكولوگيا سالالارى بويىنشا جوبالاردى دامىتۋ, اۋىل شارۋاشىلىعى, ماشينا جاساۋ, ءبىلىم بەرۋ, كوممۋنيكاتسيا جانە تسيفرلاندىرۋ باعىتتارىن قولداۋ, ازىق-ت ۇلىك قاۋىپسىزدىگىن قامتاماسىز ەتۋ ماسەلەلەرى دە كوتەرىلدى. پارلامەنتتەر بۇل باستامالاردى زاڭنامالىق تۇرعىدان قولداۋعا دايىن ەكەنى اتاپ ءوتىلدى.
سونىمەن قاتار ەكى ەل اراسىنداعى رۋحاني ديپلوماتياعا ءمان بەرىلدى. ماۋلەن اشىمباەۆ الەمدىك جانە ءداستۇرلى دىندەر كوشباسشىلارى سەزىن وزبەكستان تاراپىنىڭ تۇراقتى قولداپ كەلە جاتقانىن, وزبەكستان مۇسىلماندارى باسقارماسىنىڭ بەلسەندى قاتىساتىنىن اتاپ ءوتتى. ول باۋىرلاس ەلدىڭ دىنارالىق ديالوگتى دامىتۋعا قوسقان ۇلەسى ءۇشىن ريزاشىلىعىن ءبىلدىردى.
ءوز كەزەگىندە تانزيلا نارباەۆا قازاقستاننىڭ ورتالىق ازياداعى تۇراقتىلىق پەن دامۋ ىسىنە قوسقان ۇلەسىن جوعارى باعالاپ, ەكىجاقتى بايلانىستاردى تەرەڭدەتۋگە مۇددەلى ەكەنىن ايتتى. ول قازىرگى كەزەڭدە دىندەر مەن مادەنيەتتەر اراسىنداعى بەيبىتشىلىك پەن تولەرانتتىلىقتى نىعايتۋدىڭ ماڭىزدىلىعىن اتاپ ءوتتى.
ساپار اياسىندا تانزيلا نارباەۆا قازاقستان-وزبەكستان زيالى قاۋىمىنىڭ عىلىمي-شىعارماشىلىق فورۋمىنا قاتىسادى. سونداي-اق ول قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا مۇشەلەرىمەن كەزدەسىپ, «استانا» حالىقارالىق قارجى ورتالىعىنىڭ جانە «Astana Hub» IT-ستارتاپتار تەحنوپاركىنىڭ قىزمەتىمەن تانىسادى دەپ جوسپارلانعان.
