فوتو: primeminister.kz
مەملەكەتتىك ورگانداردىڭ اقپاراتتىق جۇيەلەرىن ينتەگراتسيالاۋدىڭ كەشەندى جوسپارى نەگىزىندە 224 اقپاراتتىق قۇرامداس الاڭ قۇرىلادى. بۇل ينتەگراتسيا ءۇشىن ەڭبەك شىعىندارىن ازايتۋعا, فۋنكتسيونالدىق جانە ستاتيستيكالىق ايىرماشىلىقتار تۇرعىسىنان اقپاراتتىق جۇيەلەردىڭ قايتالانۋ ماسەلەسىن شەشۋگە مۇمكىندىك بەرەدى. بۇگىنگى تاڭدا «ەلەكتروندىق ۇكىمەت» اياسىندا مەملەكەتتىك ورگاندار مەن كۆازيمەملەكەتتىك سەكتور ۇيىمدارىنىڭ 355-تەن استام اقپاراتتىق جۇيەلەرى مەن ۆەب-رەسۋرستارى جۇمىس ىستەيدى.
جاساندى ينتەللەكت دەرەكتەر ماسسيۆتەرىمەن جۇمىس ىستەۋ ەرەجەسى جانە ونى جۇزەگە اسىرۋ جوسپارى بەكىتىلدى. قۇجات جي تەحنولوگيالارىن دامىتۋ ءۇشىن دەرەكتەر قورىن قالىپتاستىرۋ ماسەلەسىن قاراستىرادى. بۇل ەرەجەلەر اقپاراتتى جيناۋ, تەكسەرۋ جانە قۇرىلىمداۋدىڭ بىرىڭعاي ستاندارتتارىن قاراستىرادى.
Smart Data Ukimet پلاتفورماسىندا مەملەكەتتىك دەربەستەندىرىلمەگەن دەرەكتەردى توپتاۋ بويىنشا جۇمىس شەڭبەرىندە Smart Data Ukimet-كە مىندەتتى تۇردە كوشىرۋگە جاتاتىن دەرەكتەر بازالارىنىڭ ءتىزىمى بەكىتىلدى.
جيىندا AITU ۇلتتىق مەسسەندجەرىن كەڭ اۋقىمدا ەنگىزۋ ماسەلەسى قارالدى. ونىڭ پيلوتتىق جۇمىسى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىندە كورسەتىلدى, ەندى اتالعان قىزمەت مەملەكەتتىك ورگاندار مەن كۆازيمەملەكەتتىك سەكتور ۇيىمدارىنىڭ بارلىعىنا ەنگىزىلەدى. مەسسەندجەرگە كوشۋ مەرزىمى 15 قىركۇيەككە دەيىن بەكىتىلدى.
پرەمەر-مينيستر قابىلدانعان قۇجاتتاردى ساپالى ءارى ۋاقتىلى ىسكە اسىرۋدىڭ ماڭىزدىلىعىن اتاپ ءوتتى.
«مەملەكەت باسشىسى قازاقستان ەۋرازياداعى تسيفرلىق حابقا اينالۋى ءتيىس دەگەن ماقساتتى العا قويىپ وتىر. ناقتى مىندەتتەر بەلگىلەندى. بۇگىنگى تاڭدا تسيفرلىق شتاب بارلىق مەملەكەتتىك ورگان مەن ۇيىمدار ءۇشىن مىندەتتى شەشىمدەر قابىلدادى. ناتيجە اقپاراتتىق قاۋىپسىزدىكتى جاقسارتۋعا جانە مەملەكەتتىك اپپاراتتىڭ تيىمدىلىگىن ارتتىرۋعا باعىتتالعان», دەدى ولجاس بەكتەنوۆ.
