بۇل جولى ۋكراينا جالعىز ەمەس. پرەزيدەنت ۆلاديمير زەلەنسكيدىڭ جانىندا ۇلىبريتانيا پرەمەر-ءمينيسترى كيرا ستارمەر, فرانتسيا باسشىسى ەممانۋەل ماكرون, گەرمانياداعى ىقپالدى ساياساتكەر فريدريح مەرتس, سونداي-اق ناتو باس حاتشىسى مارك ريۋتتە سەكىلدى جەتەكشىلەر بار. مۇنىڭ ءوزى ەۋروپا مەن ۋكراينانىڭ قايتادان تىزە قوسقانىن كورسەتەدى.
ولاردىڭ نەگىزگى ماقساتى — دونالد ترامپقا ەكى نارسەنى جەتكىزۋ. بىرىنشىدەن, ۋكراينا تاعدىرى ونىڭ قاتىسۋىنسىز شەشىلمەۋى ءتيىس. ەكىنشىدەن, بولاشاقتاعى كەز كەلگەن بەيبىت كەلىسىم تەمىردەي بەرىك قاۋىپسىزدىك كەپىلدىكتەرىمەن بەكىتىلۋى قاجەت.
تەرريتوريا ما, قاۋىپسىزدىك پە؟
رەسەي قىرىمدى ەشقاشان قايتارمايتىنىن اشىق ءبىلدىرىپ وتىر. دونباستىڭ دا باسىم بولىگى ماسكەۋدىڭ باقىلاۋىندا.
باستى ساۋال — ۋكراينا بەيبىتشىلىكتى ساقتاۋ ءۇشىن جەرىنەن ايىرىلا الا ما؟ ەۋروپالىق ديپلوماتيا جەتەكشىسى كايا كاللاس ايتقانداي, جەڭىس تەك جەردى قايتارىپ الۋمەن ولشەنبەيدى, ول تاۋەلسىزدىكتى ساقتاپ قالۋمەن دە باعالانباق.
قاۋىپ ءالى سەيىلگەن جوق
اق ۇيدە قاراستىرىلىپ جاتقان ۇسىنىس «جەردىڭ ءبىر بولىگىن كەپىلگە بەرىپ, قاۋىپسىزدىكتى نىعايتۋ» نۇسقاسىنا ۇقسايدى. دەگەنمەن, مۇنداي شەشىم ۋكراينا ءۇشىن اۋىر سىن بولماق.
ءارى اسكەري ساراپشىلاردىڭ ەسكەرتۋى دە كوڭىل الاڭداتادى: ەگەر سوعىس توقتاعان كۇننىڭ وزىندە, رەسەي ارمياسىن قالپىنا كەلتىرىپ, جاڭا قارۋ جاساپ, 3-4 جىلدا تاعى دا شابۋىلعا دايىن بولۋى مۇمكىن.
