9–10 تامىزدا وتكەن «ساندىق اقپاراتپەن جۇمىس ىستەۋ قابىلەتىن باعالاۋ» اتتى ەكىنشى تەستىلەۋ بلوگىنا 2 597 ۇمىتكەر قاتىسقان بولاتىن. ىرىكتەۋ تارتىبىنە سايكەس, ءۇشىنشى كەزەڭگە ەڭ جوعارى بالل جيناعان 600-دەن اسپايتىن كانديدات ء(ار سالالىق باعىت بويىنشا – 100-دەن اسپايتىن) جىبەرىلەدى.
الايدا بىردەي ناتيجە كورسەتكەندەر بولعاندىقتان, بۇل جولى كەلەسى كەزەڭگە 683 ۇمىتكەر ءوتتى. سالالىق باعىتتار بويىنشا ءوتۋ بالى تومەندەگىدەي:
- اگروونەركاسىپ جانە ەكولوگيا – 13 بالل;
- سىرتقى ساياسات جانە ينۆەستيتسيالار – 16 بالل;
- ينفراقۇرىلىم, ونەركاسىپ جانە ساۋدا ساياساتى – 20 بالل;
- الەۋمەتتىك ساياسات جانە ازاماتتىق قوعام – 18 بالل;
- تسيفرلاندىرۋ – 18 بالل;
- ەكونوميكالىق جانە قارجىلىق ساياسات – 18 بالل;
كانديداتتاردىڭ تولىق ءتىزىمى pkrezerv.gov.kz رەسمي پورتالىندا جاريالاندى.
ءۇشىنشى كەزەڭ – «سيتۋاتسيالىق تاپسىرمالاردى شەشۋ» – بيىلعى جىلدىڭ 16 تامىزىندا وتەدى. بۇل كەزەڭدە مەملەكەتتىك قىزمەتكە ءتان ناقتى جاعدايلاردا باسقارۋشىلىق شەشىم قابىلداۋ قابىلەتى باعالانادى.
بارلىق قاتىسۋشىلار 15 تامىز ساعات 23:59-عا دەيىن (استانا ۋاقىتىمەن) جەكە كابينەتى ارقىلى تىركەلۋى ءتيىس. ىرىكتەۋ بارىسىنىڭ اشىقتىعى مەن ادىلدىگىن قامتاماسىز ەتۋ ماقساتىندا پروكتورينگ جۇيەسى قولدانىلادى. تالاپتاردى بۇزۋ – سونىڭ ىشىندە بوگدە كومەكتى پايدالانۋ, AnyDesk, TeamViewer سەكىلدى قاشىقتان باسقارۋ باعدارلامالارىن قوسۋ, كامەرا نەمەسە ميكروفوندى ءوشىرۋ, سمارتفون مەن قۇلاققاپ قولدانۋ, تەست مازمۇنىن كوشىرۋ – ناتيجەلەردى جويۋعا نەگىز بولادى. كانديداتتار ءۇشىن ارنايى نۇسقاۋلىق جەكە كابينەتتە ورنالاستىرىلعان.
