وتكىزۋ پۋنكتتەرىندەگى جۇمىستى تەكسەردى

پرەمەر-مينيستر قىرعىز رەسپۋبليكاسىمەن شەكارادا ورنالاسقان «قورداي» جانە «قاراسۋ» اۆتوكولىك وتكىزۋ بەكەت­تەرى­نە بارىپ, نىسانداردىڭ ين­­ف­راقۇرىلىمىمەن, بەكەتتەگى وزەك­تى ماسەلەلەرمەن جانە مۇن­داعى جۇمىستى شيراتۋ جونىندەگى جوسپارلارمەن تانىستى.

ەاەو ەلدەرىمەن شەكارادا 39  اۆتوكولىك وتكىزۋ پۋنكتى بار. اتالعان بەكەتتەردىڭ ەكەۋىندە جوندەۋ جۇمىستارى مەجەلى مەرزىمدە تولىققاندى اياقتالعان. جاڭعىرتۋ جۇمىستارى 10 پۋنكتتە, ونىڭ ىشىندە قازاقستان-رەسەي شەكاراسىندا باستالعان. وزگە دە وتكىزۋ پۋنكتتەرى جاڭعىرتىلماق.

«قورداي» اۆتوكولىك وتكىزۋ بەكەتىندە جۇرگىزىلگەن جاڭعىرتۋ جۇمىستارىنىڭ ناتيجەسىندە قوزعالىس جولاقتارىنىڭ سانى 4-تەن 8-گە دەيىن ارتقان. سونداي-اق تولقۇجاتتىق قاداعالاۋ كابينالارىنىڭ سانى 20-دان 40-قا دەيىن جەتكىزىلگەن. ناقتى دەرەككە جۇگىنسەك, مۇنداعى وتكىزۋ قابىلەتى 4 ەسەگە, اۆتوكولىك بو­يىنشا 2,7 ەسەگە وسكەن.

ال «قاراسۋ» پۋنكتى بو­يىنشا جاڭعىرتۋ جۇمىستارى باستالدى. قولعا الىنعان جۇمىستىڭ ناتيجەسىندە مۇندا وتكىزۋ قابىلەتى تاۋلىگىنە 700-دەن 2 مىڭنان استام كولىك قۇرالىنا دەيىن ارتتىرۋعا مۇمكىندىك تۋماق. سونىمەن قاتار جۇك اعىنى مەن كولىك قوزعالىسىن جاقسارتۋ جوسپارلانعان.

ۇكىمەت باسشىسى شەكارا نىسان­­دارى ترانسشەكارالىق ىنتى­ماق­­تاستىقتى دامىتۋدا ماڭىز­­دى ءرول اتقاراتىنىن جانە حا­لىق­­ارالىق اۆتوموبيل جانە جولاۋ­­شىلار قاتىناسىن قامتاما­­سىز ەتەتىنىن اتاپ ءوتتى. ولارعا رەكونسترۋكتسيالاۋ جۇمى­سىن جۇرگىزۋ مەملەكەت باسشىسى­نىڭ جەكە باقىلاۋىنا الىنعان. 

ولجاس بەكتەنوۆ جوندەۋ جۇمىستارىنىڭ ساپالى ءارى ۋاق­تىلى ورىندالۋىن قامتا­ماسىز ەتۋدى, سونداي-اق راسىم­دەۋ جۇمىستارىن جىلدامداتۋ بويىنشا تسيفرلىق تەحنولوگيالاردى ەنگىزۋدى جانداندىرۋ كەرەكتىگىن اتاپ ءوتتى. سونىمەن قاتار ازاماتتار مەن سىرتقى ەكونوميكالىق قىزمەتكە قاتىسۋشىلار ءۇشىن قاۋىپسىزدىكتى قامتاماسىز ەتۋ جانە جايلىلىقتى ارتتىرۋ ماقساتىندا جاعداي جاساۋ ءۇشىن بىرقاتار تاپسىرما جۇكتەدى.

ساپار بارىسىندا «باتىس ەۋروپا – باتىس قىتاي» حالىق­ارالىق ءدالىزىنىڭ قۇرامىندا تاۋار­لاردى ساقتاۋ, وڭدەۋ, شوعىر­لاندىرۋ جانە وتكىزۋدىڭ نەگىز­گى ورتالىعىنا اينالاتىن يندۋس­تريالىق-ساۋدا-لوگيستيكا­لىق كەشەن سالۋ جوباسىن جۇزە­گە اسىرۋ تۋرالى باياندالدى. ولجاس بەكتەنوۆ قۇرىلىس جۇمىس­تارىنىڭ مەرزىمى سوزىلىپ كەتۋىنە بايلانىستى سىن ايتىپ, قىسقا مەرزىمدە ءتيىستى شارالار قابىل­داۋدى جانە جۇمىس ساپاسى مەن قارقىنىن قاداعالاۋدى كۇشەيتۋدى تاپسىردى.

جامبىل وبلىسى