ءىس-شارانى «باقىتتى بالا» قوعامدىق قورى مەن كاسىبي الەۋمەتتىك قىزمەتكەرلەردىڭ ۇلتتىق اليانسى, سونداي-اق «ازاماتتىق باستامالاردى قولداۋ ورتالىعى» كەاق ۇيىمداستىردى.
جيىنعا مەملەكەتتىك ورگانداردىڭ, ۇكىمەتتىك ەمەس ۇيىمداردىڭ, ءبىلىم بەرۋ مەكەمەلەرىنىڭ جانە حالىقارالىق ۇيىمداردىڭ وكىلدەرى قاتىستى.
تالقىلاۋ بارىسىندا كەلەسى ماسەلەلەر قارالدى:
– ءبىلىم بەرۋ جانە تاربيە جۇيەسىنە حالىقارالىق ستاندارتتاردى ەنگىزۋ;
– حالىقتىڭ وسال توپتارىن ازاماتتىق قاتىسۋ پروتسەستەرىنە تارتۋ;
– ارنايى الەۋمەتتىك قىزمەتتەر كورسەتۋ بويىنشا حالىقارالىق تاجىريبە;
– ينكليۋزيۆتى قوعام قۇرۋداعى بالالار مەن جاسوسپىرىمدەر قاۋىمداستىعىنىڭ ءرولى;
– ەرەكشە بالالاردىڭ تابىستى ومىرلىك جەتىستىكتەرى;
– الەۋمەتتىك جۇمىستا سۋپەرۆيزيانىڭ ماڭىزى;
– دەنساۋلىق ساقتاۋ جۇيەسىنە كاسىبي ستاندارتتاردى ەنگىزۋ.
قاتىسۋشىلار حالىقارالىق ستاندارتتاردى قازاقستاندىق تاجىريبەگە بەيىمدەۋ ماقساتىندا سەكتورارالىق ىنتىماقتاستىقتى كۇشەيتۋدىڭ, تاجىريبە الماسۋ مەن ناقتى ۇسىنىستار ازىرلەۋدىڭ ماڭىزىن اتاپ ءوتتى. الەۋمەتتىك قىزمەتكەرلەردى دايارلاۋ جانە ولاردىڭ بىلىكتىلىگىن ارتتىرۋ جۇيەسىن حالىقارالىق تالاپتارعا سايكەس جەتىلدىرۋ قاجەتتىلىگى دە ءسوز ەتىلدى.
سونىمەن قاتار, الەۋمەتتىك جۇمىس جۇيەسىن ينستيتۋتسيونالدىق تۇرعىدا دامىتۋدىڭ, سونىڭ ىشىندە ۇەۇ-عا قاجەتتى الەۋمەتتىك باعىتتاعى رەسۋرستاردىڭ قولجەتىمدىگى تالقىلاندى. بالالاردىڭ قۇقىقتارىن قورعاۋ مەن كەمسىتۋشىلىكتىڭ الدىن الۋ سالاسىندا قۇقىقتىق تەتىكتەردى دامىتۋ ماسەلەسىنە دە نازار اۋدارىلدى.
حالىقارالىق ساراپشىلارمەن جانە ۇيىمدارمەن تۇراقتى تاجىريبە الماسۋ, قازاقستاندىق مامانداردىڭ شەتەلدىك تاعىلىمدامالارعا قاتىسۋى جانە الىنعان ءبىلىم مەن تاجىريبەنى ەل جاعدايىنا بەيىمدەۋ قاجەتتىلىگى دە ايتىلدى.
ءىس-شارا بارىسىندا ازىرلەنگەن ۇسىنىستار ءتيىستى مەملەكەتتىك ورگاندار مەن ازاماتتىق قوعام ينستيتۋتتارىنا جولدانىپ, ودان ءارى قارالاتىن بولادى.
