جىل سايىن ورتا ەسەپپەن 54 مىڭعا جۋىق ءسابي دۇنيەگە كەلەتىن وڭىردە سوڭعى ەكى جىلدا انا مەن بالا ءولىمىنىڭ كورسەتكىشتەرى تۇراقتى تۇردە تومەندەگەن. وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋۆاليەۆتىڭ ايتۋىنشا, بۇل وڭ ديناميكا پروفيلاكتيكالىق سكرينينگ, پەريناتالدىق كومەك جانە كادر دايىندىعى جۇيەسىندەگى ساپالى وزگەرىستەردىڭ ناتيجەسى. بۇگىندە وڭىردە پەريناتالدىق سكرينينگپەن قامتۋ دەڭگەيى 88%-عا جەتكەن. بۇل – حالىقارالىق ستاندارتتارعا جاقىنداعان جوعارى كورسەتكىش. بۇل ماقساتتا 47 ۋدز مامانى وقىتىلىپ, ونىڭ 12-ءسى ۇلىبريتانياداعى Fetal Medicine Foundation (FMF) سەرتيفيكاتىنا يە بولعان. وسى شارالاردىڭ ناتيجەسىندە تۋا بىتكەن دامۋ اقاۋلارىنىڭ ەرتە دياگنوستيكاسى 4%-عا ارتقان.
جالپى وڭىردە وسى جىلدىڭ 6 ايىندا 22 638 بالا دۇنيەگە كەلگەن. وبلىستا 22 پەرزەنتحانا قىزمەت كورسەتەدى. بوساندىرۋ ۇيىمدارىندا 319 اكۋشەر-گينەكولوگ, 89 نەوناتولوگ, 101 انەستەزيولوگ-رەانيماتولوگ جۇمىس ىستەيدى. 165 اكۋشەر-گينەكولوگ وتا جاساۋ داعدىلارىن مەڭگەرگەن.
ايتا كەتەيىك, 2025 جىلدىڭ باسىنان بەرى №1 وبلىستىق پەريناتالدىق ورتالىعىندا 4050 نارەستە دۇنيەگە كەلدى. ونىڭ ىشىندە, 72-ءسى – ەگىزدەر. بۇل كورسەتكىش وتكەن جىلمەن سالىستىرعاندا 271 بالاعا كوپ.
