11 تامىزدا وتكەن سالتاناتتى اشىلۋ ءىس-شاراسىنا تۇركى اكادەمياسىنىڭ پرەزيدەنتى شاھين مۇستافاەۆ, قاراباق ۋنيۆەرسيتەتىنىڭ رەكتورى شاھين بايراموۆ, تۇركيا عىلىم اكادەمياسىنىڭ پرەزيدەنتى مۇزافەر شەكەر, سونداي-اق عىلىم جانە ءبىلىم بەرۋ قاۋىمداستىعىنىڭ وكىلدەرى قاتىستى.
17 تامىزعا دەيىن جالعاساتىن وتەتىن جازعى مەكتەپ جاس تۇركولوگ عالىمداردىڭ اكادەميالىق الەۋەتىن ارتتىرۋعا, ءتۇرلى ەلدەن كەلگەن قاتىسۋشىلار اراسىندا ءبىلىم مەن تاجىريبە الماسۋعا, سونداي-اق زاماناۋي عىلىمي تاسىلدەر مەن قولدانبالى زەرتتەۋ ادىستەرىن مەڭگەرۋگە مۇمكىندىك جاساۋعا باعىتتالعان.
باعدارلاماعا ازەربايجان, قازاقستان, قىرعىزستان, وزبەكستان, تۇركيا, سولتۇستىك كيپر تۇرىك رەسپۋبليكاسى, يران, موڭعوليا جانە سولتۇستىك ماكەدونيادان كەلگەن 35 جاسقا دەيىنگى 30 عىلىم دوكتورى مەن پوستدوكتورانت قاتىسىپ, ولار حالىقارالىق تاجىريبەسى بار عالىمدار مەن مامانداردىڭ جەتەكشىلىگىمەن ءبىلىم الىپ جاتىر.
اپتا بويى قاتىسۋشىلار عىلىمي ماقالالار دايىنداۋ, پرەزەنتاتسيالار جاساۋ جانە زەرتتەۋ گرانتتارىن ءتيىمدى پايدالانۋ باعىتتارىندا بىلىكتىلىكتەرىن ارتتىرا وتىرىپ, تۇركى مەملەكەتتەرىنىڭ تاريحى, تۇركى الەمىنىڭ ارحەولوگياسى, تۇركى حالىقتارىنىڭ ءوزارا قاتىناستارى, ونەر مەن فيلوسوفيالىق وي تاريحى, سونداي-اق تۇركى ديالەكتىلەرى مەن ادەبيەتتەرى جونىندەگى تاقىرىپتاردى زەردەلەيدى.
اشىلۋ راسىمىندە ءسوز سويلەگەن تۇركى اكادەمياسىنىڭ باسشىسى شاھين مۇستافاەۆ قاراباقتىڭ تاريحي ماڭىزىن اتاپ ءوتىپ, اكادەميانىڭ تۇركى الەمىنىڭ عىلىمي جانە مادەني مۇراسىن ساقتاۋ مەن دامىتۋ باعىتىندا قىزمەت اتقاراتىنىن جەتكىزدى. سونداي-اق ول جازعى مەكتەپتىڭ تەك ءبىلىم الماسۋ الاڭى عانا ەمەس, جاس عالىمدار اراسىنداعى دوستىق بايلانىستاردى نىعايتۋدىڭ ماڭىزدى قۇرالى ەكەنىنە توقتالىپ, قاتىسۋشىلارعا ساتتىلىك تىلەدى.
دارىستەر مەن سەمينارلاردان بولەك, قاتىسۋشىلار شىعارماشىلىق ءىس-شارالارعا قاتىسىپ, حانكەندى جانە شۋشا قالالارىنىڭ تاريحي جانە مادەني مۇراسىمەن تانىسۋ مۇمكىندىگىنە يە بولادى.
