ب.سوقپاقباەۆ اتىنداعى ورتالىق ساياباقتا وتكەن جاتتىعۋعا گرەك-ريم كۇرەسىنەن پاريج وليمپياداسىنىڭ كۇمىس جۇلدەگەرى دەمەۋ جادىراەۆ, بوكستان ازيا جانە الەمدىك دەڭگەيدەگى جۇلدەگەرلەر, بياتلون, ساداق اتۋ, دجيۋ-دجيتسۋ, بايداركا مەن كانوە چەمپيوندارى بار.
چەمپيوندار جاستارعا قيمىل-قوزعالىس تەحنيكاسىن كورسەتىپ قانا قويماي, كاسىبي سپورتتاعى ءتارتىپ پەن ەڭبەكقورلىقتىڭ ءرولىن ءتۇسىندىردى.
«بۇگىنگى اشىق جاتتىعۋعا 150-گە جۋىق جاس قاتىستى. ءبىر ساعات بويى ءبىز نەگىزگى دايىندىق جاتتىعۋلارىن جاساپ, تاجىريبە الماستىق. قاتىسۋشىلاردىڭ اراسىندا كاسىبي سپورتپەن اينالىساتىندار دا, العاش رەت مۇنداي شاراعا كەلگەندەر دە بولدى. مۇنداي جوبالار جاستاردى سپورتقا باۋليپ قانا قويماي, ولاردى جامان ادەتتەردەن الىستاتادى. بۇل باستامانى جۇزەگە اسىرۋعا «AMANAT» پارتياسىنىڭ قولداۋى زور ۇلەس قوستى. سوڭعى جىلدارى پارتيا وبلىستا ونداعان سپورت نىسانىن اشىپ, جاستار جوبالارىن تۇراقتى تۇردە قولداپ كەلەدى. وسىنداي جۇيەلى جۇمىستاردىڭ ارقاسىندا وڭىرىمىزدەن جاڭا چەمپيوندار شىعاتىنىنا سەنىمدىمىن», – دەدى دەمەۋ جادىراەۆ.
جاتتىعۋ بارىسىندا قاتىسۋشىلار چەمپيوندارمەن يىق تىرەستىرىپ, ءتۇرلى دەنە شىنىقتىرۋ جاتتىعۋلارىن ورىندادى. ءار قيمىلدىڭ دۇرىس جاسالۋىنا ءمان بەرىلىپ, قاتىسۋشىلارعا جەكە كەڭەستەر بەرىلدى.
شارا سوڭىندا قاتىسۋشىلار چەمپيوندارمەن ەستەلىك سۋرەتكە ءتۇسىپ, ەركىن اڭگىمەلەستى.
ۇيىمداستىرۋشىلاردىڭ ايتۋىنشا, «چەمپيوندىق رۋح» جوباسى جىل سوڭىنا دەيىن بىرنەشە وڭىردە جالعاسىپ, مىڭداعان جاستى قامتيتىن بولادى.
الماتى وبلىسى
