مادەنيەت جانە اقپارات مينيسترلىگىنىڭ مالىمەتىنە سايكەس, وزگەرىستەر ناگرادتاۋعا كانديداتتاردى قاراۋ كەزىندە اشىقتىقتى, وبەكتيۆتىلىكتى جانە ادىلدىكتى قامتاماسىز ەتۋگە باعىتتالعان. نۇسقاۋلىقتىڭ جاڭا رەداكتسياسىندا قۇجاتتاردى رەسىمدەۋ جانە كانديداتتاردىڭ ەڭبەگىن باعالاۋ كريتەريلەرىنە قاتىستى نەگىزگى ەرەجەلەر ناقتىلاندى.
اتاپ ايتقاندا, ناگرادتاۋ قاعازىن رەسىمدەۋگە قويىلاتىن تالاپتار تولىقتىرىلدى. وندا مىندەتتى تۇردە ەڭبەك جولى, ەل مەن حالىق الدىنداعى ناقتى ەڭبەكتەرى, سونداي-اق قىلمىستىق قۇقىقبۇزۋشىلىقتار تۋرالى مالىمەتتەر ولاردىڭ جاسالعان ۋاقىتىنا قاراماستان كورسەتىلەتىن بولادى. جەكەلەگەن جاعدايلاردا ىشكى ىستەر ورگاندارىنان مىنەزدەمە تالاپ ەتىلەدى.
سونىمەن قاتار كوپبالالى انالاردى ناگرادتاۋعا قويىلاتىن تالاپتار رەتكە كەلتىرىلدى. ناگرادتاۋ تەك قازاقستان رەسپۋبليكاسىنىڭ ازاماتى بولىپ تابىلاتىن كوپبالالى انالارعا بەرىلەدى. ناگرادتاۋ قاعازىن رەسىمدەۋ كەزىندە كوپبالالى انانىڭ وزگە مەملەكەت ازاماتى بولىپ تابىلاتىن بالالارى پاسپورتتارىنىڭ كۋالاندىرىلعان كوشىرمەلەرى جانە فوتوسۋرەتتەرى قوسا بەرىلۋى كەرەك.
ايتا كەتۋ كەرەك, نۇسقاۋلىققا سايكەس مەملەكەتتىك ناگرادالاردىڭ كوشىرمەلەرىن (دۋبليكاتتارىن) دايىنداۋ كەزىندە قىمبات باعالى مەتالدار قولدانىلمايدى.
مەملەكەتتىك ناگرادالارعا قۇقىقتى قالپىنا كەلتىرۋ مۇمكىندىگى ۋاكىلەتتى ورگانداردىڭ ءوتىنىشى بويىنشا, سوت اكتىلەرىن قوسا العاندا, راستايتىن قۇجاتتار ۇسىنىلعان جاعدايدا قامتاماسىز ەتىلەدى.
قابىلدانعان وزگەرىستەر ناگرادتاۋعا ۇسىنۋ ءراسىمىن رەتكە كەلتىرۋگە جانە مەملەكەتتىك ناگرادالار ينستيتۋتىنا دەگەن سەنىمدى ارتتىرۋعا باعىتتالعان.
