جاقىندا بولگاريانىڭ وبزور قالاسىنداعى ايگىلى «امفيتەاتر» ساحناسىندا حورەوگرافيالىق ونەردىڭ «بي جاعالاۋى» اتتى حالىقارالىق فەستيۆال-بايقاۋى ءوتتى. بۇل ءىس-شارا «Art in Motion» حالىقارالىق جوباسىنىڭ اياسىندا ۇيىمداستىرىلعان.
فەستيۆال قازاقستان رەسپۋبليكاسى مەن رەسەي فەدەراتسياسىنىڭ بولگاريا رەسپۋبليكاسىنداعى ەلشىلىكتەرىنىڭ قولداۋىمەن ءوتتى. باستى ماقسات – حورەوگرافيا ارقىلى ۇلتتار اراسىنداعى دوستىقتى نىعايتۋ, ءداستۇرلى جانە زاماناۋي بي مادەنيەتىن دامىتۋ, دارىندى ونەرپازداردى قولداۋ جانە حالىقتىق حورەوگرافيا مۇراسىن ساقتاۋ.
بايقاۋعا قازاقستان اتىنان قاتىسقان سارىارقا اۋدانىنىڭ بەلسەندى ۇزاق ءومىر ءسۇرۋ ورتالىعىنىڭ «Kerbez models» توبى ەل نامىسىن ابىرويمەن قورعاپ, 60+ جاس ساناتى بويىنشا ء«سان شوۋى. انسامبل» نوميناتسياسىنىڭ ءبىرىنشى دارەجەلى لاۋرەاتى اتانىپ, سونداي-اق «ساحنا بەينەسىن جارقىن بەينەلەگەنى ءۇشىن» اتتى ارنايى ماراپاتتارعا يە بولدى.
ونەر دوداسىندا ەلوردالىق سانقوي اجەلەر ەۋرازيالىق ديزاينەرلەر وداعىنىڭ مۇشەسى, ديزاين اكادەمياسىنىڭ اكادەميگى, «الماس تاستى التىن قايشى» يەگەرى قايرول ابىشەۆتىڭ «Zeken moda» برەندىنىڭ كيىم ۇلگىلەرىن ۇسىندى.
ايتا كەتەيىك «Kerbez_models» توبىنا ەكاتەرينا جاقياقىزى جەتەكشىلىك ەتەدى. بۇگىندە ءسان توبىنىڭ كەربەز اجەلەرى ۇلتتىق ناقىشتاعى كيىم ۇلگىلەرىن دارىپتەپ ءجۇر.
