سەميناردىڭ ماقساتى – كاسىپكەرلىك قاۋىمداستىققا جاڭا سالىق كودەكسىندە كوزدەلگەن سالىقتىق اكىمشىلەندىرۋدەگى نەگىزگى وزگەرىستەردى جەتكىزۋ, الداعى وزگەرىستەردىڭ ءمانى مەن ماڭىزدىلىعى جانە ولاردىڭ بيزنەس پەن جالپى ەكونوميكانىڭ تۇراقتى دامۋىنا اسەرى تۋرالى ورتاق تۇسىنىك قالىپتاستىرۋ بولدى.
ۇلىتاۋ وبلىسى – تاۋ-كەن جانە مەتاللۋرگيا سالاسىنىڭ جەتەكشى كاسىپورىندارى شوعىرلانعان, ستراتەگيالىق ماڭىزى جوعارى ونەركاسىپتىك ءوڭىر. Kazakhmys كورپوراتسياسى مەن جايرەم تاۋ-كەن بايىتۋ كومبيناتى سىندى ءىرى سالىق تولەۋشىلەر بيۋدجەت كىرىس بولىگىن قالىپتاستىرۋدا ايتارلىقتاي ءرول اتقارادى.
تۇسىندىرمەلەردى قر قم مەملەكەتتىك كىرىستەر كوميتەتىنىڭ توراعا ورىنباسارى جانىبەك نۇرجانوۆ, قر قم مەملەكەتتىك كىرىستەر كوميتەتىنىڭ ادىستەمە دەپارتامەنتىنىڭ ديرەكتورى وراز ابدراحمانوۆ جۇرگىزدى. ءىس-شارانىڭ مودەراتورى ۇلىتاۋ وبلىسى كاسىپكەرلەر پالاتاسىنىڭ ديرەكتورى گۇلميرا قاجەنوۆا.
ءوز سوزدەرىندە مەملەكەتتىك كىرىستەر كوميتەتىنىڭ وكىلدەرى جاڭا سالىق كودەكسىندە كوزدەلگەن تۇجىرىمدامالىق تاسىلدەردى جان-جاقتى تانىستىرىپ, قوسىلعان قۇن سالىعىن اكىمشىلەندىرۋ ءتارتىبىن جەتىلدىرۋ, كورپوراتيۆتىك تابىس سالىعى مەن ققس بويىنشا سارالانعان مولشەرلەمەلەردى ەنگىزۋ, سالىقتىق راسىمدەردى تسيفرلاندىرۋ جانە تالدامالىق قۇرالداردى كۇشەيتۋ, ەسەپتىلىك پەن سالىقتىق جەڭىلدىكتەر جۇيەسىن وڭتايلاندىرۋ جانە بەيرەزيدەنتتەر مەن جەر قويناۋىن پايدالانۋشىلاردى سالىق سالۋ جۇيەسىن جاڭعىرتۋ سياقتى ماسەلەلەرگە باسا نازار اۋداردى.
تالقىلانعان وزگەرىستەر سالىق جۇيەسىنىڭ اشىقتىعىن, تيىمدىلىگىن جانە ادىلدىگىن ارتتىرۋعا, سونداي-اق مەملەكەت پەن بيزنەس اراسىنداعى ديالوگتى نىعايتۋعا باعىتتالعان.
مەملەكەتتىك كىرىستەر كوميتەتى سالىق تولەۋشىلەردى سالىق زاڭناماسىنداعى وزگەرىستەر تۋرالى حاباردار ەتۋ جانە ىسكەرلىك قاۋىمداستىق وكىلدەرىمەن اشىق ديالوگتى قامتاماسىز ەتۋ بويىنشا جۇمىستارىن جالعاستىرادى.
سەمينار بارىسىندا قاتىسۋشىلار شاعىن جانە ورتا بيزنەستى قامتيتىن سالىق زاڭناماسىنداعى نەگىزگى وزگەرىستەردى تەرەڭىرەك ءتۇسىندى.
ديففەرەنتسيالدى سالىق ستاۆكالارى, پروگرەسسيۆتى جەكە تابىس سالىعى ستاۆكالارى, ققس رەفورماسى, «بايلىق سالىعىن» ەنگىزۋ جانە سالىقتىق ارنايى رەجيمدەر مەن اۆانستىق تولەمدەردى وزگەرتۋ ماسەلەلەرى تالقىلاندى.
شاعىن جانە ورتا بيزنەسپەن كەزدەسۋ تەك پايدالى اقپاراتتىڭ كوزى عانا ەمەس, سونىمەن قاتار شاعىن جانە ورتا بيزنەستىڭ الدىندا تۇرعان وزەكتى ماسەلەلەردى تالقىلاۋ الاڭى بولدى.
ۇلىتاۋ وبلىسى
