مەملەكەتتىك قىزمەت ىستەرى اگەنتتىگىنىڭ مالىمەتىنشە, 2-3 تامىزدا وتكەن «ماتىندىك اقپاراتپەن جۇمىس ىستەۋ قابىلەتىن باعالاۋ» تەستىلەۋىنە 4 876 ۇمىتكەر قاتىستى. كەلەسى كەزەڭگە وتكەن جاستاردىڭ تولىق تىزىمىمەن pkrezerv.gov.kz رەسمي سايتىنان تانىسۋعا بولادى.
ىرىكتەۋ تارتىبىنە سايكەس, كەلەسى تەستىلەۋ – «ساندىق اقپاراتپەن جۇمىس ىستەۋ قابىلەتىن باعالاۋعا» قاتىسۋشىلاردىڭ جالپى سانىنىڭ 50 پايىزى جىبەرىلەدى. بىرنەشە ۇمىتكەردىڭ ناتيجەسى بىردەي بولعان جاعدايدا كەلەسى تەستىلەۋ بلوگىنا كوبىرەك قاتىسۋشىلار سانى جىبەرىلۋى مۇمكىن. وسىلايشا, تەستىلەۋدىڭ ەكىنشى بلوگى «ساندىق اقپاراتپەن جۇمىس ىستەۋ قابىلەتىن باعالاۋعا» ەڭ جاقسى ناتيجە كورسەتكەن 2 677 ۇمىتكەر جىبەرىلدى.
سالالىق باعىتتار بويىنشا ءوتۋ بالى:
- «اگروونەركاسىپتىك كەشەن جانە قورشاعان ورتانى قورعاۋ» – 14 بالل;
- «سىرتقى ساياسات جانە ينۆەستيتسيالار» – 17 بالل;
- «ينفراقۇرىلىمدى, ونەركاسىپتى دامىتۋ جانە ساۋدا ساياساتى» – 16 بالل;
- «الەۋمەتتىك ساياسات جانە ازاماتتىق قوعام» – 14 بالل;
- «تسيفرلاندىرۋ» – 15 بالل;
- «ەكونوميكالىق جانە قارجىلىق ساياسات» – 15 بالل.
تەستىلەۋدىڭ ەكىنشى بلوگى وسى جىلدىڭ 9 تامىزىندا وتەدى. بۇل كەزەڭدە ۇمىتكەر كەستەلەر, گرافيكالار جانە دياگراممالار تۇرىندەگى ساندىق اقپاراتپەن جۇمىس ىستەۋ قابىلەتىن انىقتاۋعا باعىتتالعان 25 تەست تاپسىرماسىنان تۇراتىن تەست تاپسىرادى.
«ساندىق اقپاراتپەن جۇمىس ىستەۋ قابىلەتىن باعالاۋ» تەستىلەۋىنە جىبەرىلگەن ۇمىتكەرلەر 8 تامىز ساعات 23:59-عا دەيىنگى مەرزىمدە (استانا ۋاقىتى بويىنشا) ءوزىنىڭ جەكە كابينەتىندە تەست تاپسىرۋ ۋاقىتىن تاڭداۋى قاجەت.
– تەستىلەۋ ءراسىمىنىڭ اشىقتىعى مەن ادالدىعىن قامتاماسىز ەتۋ ماقساتىندا پروكتورينگ جۇيەسى قولدانىلاتىنىن ەسكە سالامىز. بەلگىلەنگەن تالاپتاردى ساقتاماۋ, ونىڭ ىشىندە بوگدە ادامداردىڭ كومەگىن پايدالانۋ, قاشىقتان قول جەتكىزۋگە ارنالعان باعدارلامالاردى (AnyDesk, TeamViewer, DWService جانە ت.ب.) قولدانۋ, كامەرانى جانە/نەمەسە ميكروفوندى ءوشىرۋ, سمارتفونداردى, قۇلاققاپتاردى جانە وزگە دە ەلەكتروندىق اقپارات تاسىمالداۋشى قۇرىلعىلاردى پايدالانۋ, سونداي-اق تەست تاپسىرمالارىن كەز كەلگەن تاسىلمەن كوشىرۋ, تەستىلەۋ ناتيجەلەرىن جويۋ ءۇشىن نەگىز سانالادى. ۇمىتكەرلەر جەكە كابينەتتە ورنالاستىرىلعان «ساندىق اقپاراتپەن جۇمىس ىستەۋ قابىلەتىن باعالاۋ» تەستىلەۋىنە ارنالعان نۇسقاۋلىقتىڭ تالاپتارىمەن تولىعىراق تانىسا الادى, - دەپ اتاپ وتەدى اگەنتتىكتەن.
