فوتو: اقوردا
پرەزيدەنت قۇقىق قورعاۋ ورگاندارىنىڭ كەڭەيتىلگەن القا وتىرىسىندا بەرگەن تاپسىرمالارىنىڭ ورىندالۋ بارىسىمەن تانىستى.
ءمينيستردىڭ مالىمەتىنە سايكەس, بيىلعى 7 ايدا قابىلدانعان كەشەندى شارالاردىڭ ناتيجەسىندە ەلدەگى قىلمىس سانى 9 مىڭعا ازايعان. ادام ءولتىرۋ, قاراقشىلىق, دەنساۋلىققا اۋىر زيان كەلتىرۋ, بۇزاقىلىق جانە تاعى باسقا نەگىزگى قىلمىس تۇرلەرىنىڭ تومەندەۋى بايقالادى. بۇل ىستەردى اشۋ دەڭگەيى جاقسارىپ كەلەدى.
اۋىر جانە اسا اۋىر قىلمىسقا قاتىسى بار 146 قىلمىستىق توپ جويىلدى.
پوليتسيا وندىرىسىندەگى بارلىق قىلمىستىق ءىس بويىنشا ازاماتتاردىڭ 28 ميلليارد تەڭگەدەن استام شىعىنى وتەلدى.
ەرجان سادەنوۆ قىلمىسكەرلەردى ىزدەستىرۋ جۇمىستارىنىڭ ناتيجەسى تۋرالى باياندادى. ەسەپتى كەزەڭدە ىزدەۋدە جۇرگەن 956 ادام ۇستالدى, ولاردىڭ 24-ءى شەتەلدەن قازاقستانعا ەكستراديتسيالاندى. حابار-وشارسىز كەتكەن 600 ادامنىڭ, سونىڭ ىشىندە 125 كامەلەتكە تولماعاننىڭ جۇرگەن جەرى انىقتالدى.
ينتەرنەت-الاياقتىققا قارسى ءىس-قيمىل اياسىندا 6 call-ورتالىق جويىلدى, 67 ميلليون جالعان قوڭىراۋ مەن 3 مىڭنان استام الاياقتىق سايت بۇعاتتالدى. الاياقتاردىڭ 2,8 ميلليارد تەڭگەنى شىعارۋىنا جول بەرىلمەدى.
11 توننادان استام ەسىرتكىنىڭ اينالىمعا تۇسۋىنە توسقاۋىل قويىلىپ, 19,5 مىڭ ەسىرتكى سايتى بۇعاتتالدى.
سونداي-اق مينيستر ماس كۇيدە جاسالاتىن قىلمىستىڭ الدىن الۋ, كادرلىق الەۋەتتى ارتتىرۋ جانە قىلمىستىق-اتقارۋ جۇيەسىن جەتىلدىرۋ شارالارىنا توقتالدى.
كەزدەسۋ سوڭىندا پرەزيدەنت ەلىمىزدەگى قۇقىقتىق ءتارتىپ پەن قوعامدىق قاۋىپسىزدىكتى ودان ءارى ارتتىرۋعا قاتىستى بىرقاتار مىندەت جۇكتەدى.
