سۋرەتتى تۇسىرگەن – اۆتور
توت باسپايتىن قاڭىلتىردان جاسالعان, سارى ءتۇستى قازاقى ويۋلارمەن قاپتالعان دومبىرا كادىمگى قازاقتىڭ ۇلتتىق اسپابىنان اينىمايدى ەكەن. «دومبىرانى ءتۇرلى اعاشتان جاساعاندى بىلەمىز عوي. تەمىردەن جاسالعان دومبىرانى العاش كورۋىم. بۇل دومبىرانى جاساۋعا قانشاما ەڭبەك كەتتى دەسەڭىزشى... تەمىر قالدىعىن قابىلدايتىن جەردەن كورىپ قالىپ, الا الماي كەتتىم. ساتاتىن قوجايىنى بولماي قالدى. بىراق «دومبىرانىڭ ورنى ول جەر ەمەس ەدى عوي» دەپ ىشتەي قىنجىلدىم» دەپ جازىپتى نۇرلان.
– نۇرلاننىڭ جازباسىن كورىپ قالىپ, بىردەن وقيعا ورنىنا اسىقتىم. ءوزىم مۋزەي قىزمەتكەرى بولعاندىقتان, ەرەكشە جادىگەردىڭ باعاسىن بىلەم عوي. مەتالل قابىلداۋشىلار بۇل دومبىراعا جۇرتتىڭ نازارى اۋا باستاعانىنا الاڭدادى ما, اۋەلى «قوجايىنى جوق» دەگەن سىلتاۋمەن ساتۋدان باس تارتتى. ورتاعا ءتارتىپ ساقشىلارىن ارالاستىرىپ, ەرەكشە اسپاپتى اقىرى ساتىپ الدىم. قۇجاتىن تولتىرىپ, ورال قالاسىنداعى دومبىرا مۋزەيىنە تاپسىرعالى وتىرمىن, – دەيدى باتىس قازاقستان وبلىستىق تاريحي-ولكەتانۋ مۋزەيىنىڭ قور ساقتاۋشىسى مۇحتار وتەس.
ارينە, مەتالل قابىلدايتىن جەردەگى جىگىتتەرگە ەشكىمنىڭ وكپەسى جوق. «بۇل قازاقتىڭ كيەلى اسپابى عوي» دەپ جوعارى ءىلىپ قويعان ەكەن, سوعان ريزا بولدىم!» دەپ مۇحتاردىڭ ءوزى ايتىپ وتىر. تەك وكىنىشتىسى – بۇل دومبىرانى كىم جاساعان, يەسى كىم, تاريحى قانداي؟ – ازىرگە وسى ساۋالداردىڭ جاۋابى تابىلماي تۇر.
ەرەكشە دومبىرانى ءبىز دە قولىمىزعا ۇستاپ كوردىك. مەتالدان جاسالعانىنا قاراماستان جەپ-جەڭىل, ادەتتەگى اسپاپتان اۋىرلىعى شامالى. ولشەمدەرى دە ءدال سونداي. قوس ىشەگى ساقتالماعانىمەن, پەرنەسى تاعۋلى, كەزىندە قولدانىلعانى كورىنىپ تۇر. دومبىرا وتە شەبەر جاسالعان, ونەر تۋىندىسى دەسە بولعانداي.
بۇيىرسا بۇل جادىگەر ورال قالاسىندا بىلتىر اشىلعان دومبىرا مۋزەيىندەگى تاريحي دومبىرالار كوللەكتسياسىنا قوسىلاتىن بولدى.
باتىس قازاقستان وبلىسى
