ءجۇزۋ جارىسىنا ەلىمىزدىڭ ءار ايماعىنان 500-دەن استام قاتىسۋشى جيىلعان. ولاردىڭ اراسىندا جۇلدە الامىن دەپ ەمەس, بابىن بايقايمىن دەپ كەلگەندەر ءبىر قاۋىم. ارينە, ولار ءۇشىن ولكەنىڭ تابيعاتىن تاماشالاپ, بۇقارالىق سيپاتتا ۇيىمداستىرىلعان ءىس-شاراعا قاتىسۋدىڭ ءوزى جەڭىس. كىم ءبىلسىن, ولار دا جارىستان سوڭ جۇزۋگە شىنداپ كىرىسىپ, الداعى جارىستاردا جۇلدەگە ىلىگۋى ابدەن مۇمكىن عوي. دەسەك تە وسى كۇنى اۋەسقويلار اراسىنداعى جارىستارعا قاتىسىپ, جۇلدە الىپ جۇرگەن مىقتىلار دا بولدى. جارىس قورىتىندىسى بويىنشا ەرلەر اراسىندا ۆلاديسلاۆ سۋحارەۆ ۇزدىك اتانسا, ايەلدەر اراسىندا ليۋدميلا ياكوۆلەۆا ىزىنە قارا سالدىرمادى. ءبىر ارتىقشىلىعى, ءجۇزۋ بارلىق ساناتتاعى ازاماتتار ءۇشىن تەگىن بولدى. وسىنى ەستىگەن بۋرابايداعى دەمالۋشىلار دا سۋعا سۇڭگىدى. ءىس-شارا كۋرورتتى ايماقتا ءتۋريزمدى دامىتۋمەن اينالىساتىن «بۋراباي دامۋ» سەرىكتەستىگىنىڭ قولداۋىمەن ءوتتى.
ء«بىز بۇقارالىق سيپاتتا وتەتىن وسىنداي ءىس-شارالاردى اركەز قولدايمىز. ءجۇزۋ جارىسى بەسىنشى جىل قاتارىنان ۇيىمداستىرىلىپ كەلەدى. ال, بۋرابايدا وسىمەن ءۇشىنشى مارتە ءوتتى. سەبەبى ءبىز وسىنداي ءىس-شارالار سالاماتتى ءومىر سالتىن ناسيحاتتاۋعا تاپتىرمايتىن مۇمكىندىك ەكەنىن بىلەمىز. ءارى وسى ارقىلى ىشكى ءتۋريزمنىڭ ۇلەسىن ارتتىرۋدىڭ مۇمكىندىگى تۋدى», دەيدى «بۋراباي دامۋ» سەرىكتەستىگىنىڭ ءبولىم باسشىسى شىڭعىس ورازالين.
وسىمەن جىل سايىن جازدا وتەتىن PIKEMAN ءجۇزۋ جارىسىنىڭ كەزەكتى ماۋسىمى اياقتالدى. ءجۇزۋ سپورتىمەن شۇعىلداناتىن ازاماتتار كەلەر جىلعى جارىستى اسىعا كۇتەدى.
