سونىڭ ءبىرى – ءسۇت ونىمدەرىن شىعاراتىن «ليدەر-2010». كاسىپورىننىڭ زاڭگەرى ارمان مولداعازيننىڭ ايتۋىنشا, وڭىردە اقىلى جولدار پايدا بولعالى زاۋىتتىڭ كولىك تاسىمالىنا كەتەتىن شىعىنى دا ءبىرشاما ءوسىپ كەتكەن. بۇگىندە قوستاناي وبلىسىندا ەكى اقىلى جول جۇمىس ىستەپ تۇر. ونىڭ ءبىرى – ۇزىندىعى 163 شاقىرىم بولاتىن, وبلىس ورتالىعىنان ترويتسكىگە قاراي شىعاتىن رەسەي شەكاراسىنا دەيىنگى جول. ەكىنشىسى – قوستانايدان دەنيسوۆكە دەيىن اپاراتىن 151 شاقىرىمدىق جول. اتالعان ەكى باعىتقا دا اقىلى جولدى اينالىپ وتەتىن بالاما جولدارمەن دە شىعۋعا بولادى.
«الايدا اينالما مارشرۋت جولدى 300 شاقىرىمنان اسا ۇزارتىپ جىبەرەدى. ياعني تەگىن جولدار ەكونوميكالىق تۇرعىدان ءتيىمسىز. ونىڭ ۇستىنە, اينالما جولمەن جۇرەتىن بولساق, ءبىزدىڭ كاسىپورىن ءسۇت ساتىپ الاتىن, دايىن ءونىم جەتكىزەتىن ەلدى مەكەندەردىڭ ءبىرازى بۇرىننان قالىپتاسقان لوگيستيكالىق جەلىدەن تىس قالىپ قويادى», دەيدى كاسىپورىن زاڭگەرى.
جوبا اياسىندا وڭىردە نان, جۇمىرتقا, ءسۇت ونىمدەرى ءتارىزدى حالىققا كۇندەلىكتى قاجەت تاۋارلاردى شىعارۋمەن جانە تاسىمالداۋمەن اينالىساتىن كاسىپورىنداردىڭ ءتىزىمى جاسالادى. سونداي-اق اتالعان كاسىپورىندار كۇندەلىكتى تاۋار تاسيتىن اقىلى جولدار انىقتالىپ, «قازاۆتوجول» ۇك» اق-نىڭ وبلىستاعى فيليالىنا جىبەرىلەدى. كەيىن بۇل مالىمەتتەر جان-جاقتى تالدانىپ, زەردەلەنەدى.
قوستاناي وبلىستىق كاسىپكەرلەر پالاتاسىنىڭ ديرەكتورى رەنات داۋلەتپاەۆتىڭ ايتۋىنشا, مونيتورينگ جۇمىسىنىڭ ناتيجەسى اقىلى جول تولەمدەرىنىڭ مولشەرى بەكىتىلگەن نورماتيۆتىك اكتىلەردى وزگەرتۋگە نەگىز بولۋى مۇمكىن.
«جوبانىڭ باستى ماقساتى – الەۋمەتتىك ماڭىزى بار ونىمدەردى تاسىمالدايتىن كاسىپورىندار ءۇشىن قولايلى جاعداي جاساۋ, سونداي-اق جول شىعىندارىنىڭ تۇپكىلىكتى باعاعا اسەرىن ازايتۋ» دەيدى كاسىپكەرلەر پالاتاسى فيليالىنىڭ باسشىسى.
قوستاناي وبلىسى
