سۋرەت: gov.kz
اقجايىق ديقاندارى بيىل وبلىستا بارلىعى 633 مىڭ گەكتار القاپقا ەگىن ەككەن. سونىڭ ىشىندە ءداندى داقىلدار – 296,8 مىڭ گەكتار. ونىڭ 91,5 مىڭ گەكتارى – كۇزدىك داقىل بولسا, 121 مىڭ گەكتارى – مايلى داقىلدار. ال كارتوپ, كوكونىس-باقشا داقىلدارى – 4,2 مىڭ, مال ازىعى 211 مىڭ گەكتار جەردى قۇراپ جاتىر. «2025 جىلعى جوسپارىمىز بويىنشا وبلىستا بارلىق اۋىل شارۋاشىلىعى داقىلىنىڭ ەگىس القابى 612,7 مىڭ گەكتار بولۋى ءتيىس ەدى. ناتيجەسىندە, ودان دا كوبىرەك بولدى», دەيدى بەرىك مارات ۇلى.
باسقارما ۇسىنعان مالىمەتكە قاراعاندا, ءونىم كولەمى جامان ەمەس. بۇدان بولەك, شارۋالار ەرتە پىسەتىن كوكونىستى دە جيناۋعا كىرىستى. جالپى, وڭىردەگى ەگىننىڭ جاعدايى «جاقسى» مەن «قاناعاتتانارلىق» باعانىڭ اراسىندا. ءونىم مولشەرى كوپجىلدىق ورتاشا ماننەن كەم بولمايدى دەگەن بولجام بار.
كۇزگى دالا جۇمىسىن جۇرگىزۋ ءۇشىن شارۋالارعا 11,8 مىڭ توننا ارزان ديزەل جانارماي بولىنگەن. ونىڭ 3,08 مىڭ تونناسى – شىلدە ايىندا, 3,92 مىڭ تونناسى – تامىزدا, 4,3 مىڭ تونناسى – قىركۇيەكتە, قالعان 0,52 مىڭ توننا ديزەل وتىنى قازان تۋا شارۋالارعا بەرىلەدى.
بەرىك مارات ۇلى كۇزگى دالا جۇمىستارىنا تەحنيكا تولىق دايىن دەپ وتىر. بۇعان 5 312 تراكتور, 911 كومباين, 3 711 تىركەمە جانە وزگە دە تەحنيكا قاتىسپاق. وتاندىق زاۋىتتاردان جانە تىڭايتقىش ساتۋشىلاردان بارلىعى 4,5 مىڭ توننا تىڭايتقىش ساتىپ الىنعان. وبلىستاعى ارنايى ليتسەنزياسى بار 8 استىق قابىلداۋ كاسىپورنى 586 مىڭ توننا ءونىمدى قابىلداپ, ساقتاي الادى.
ديقان قاۋىمىن جاۋاپتى ماۋسىم قارساڭىندا وبلىس اكىمدىگى دە بارىنشا قولداپ وتىر. بيىل وسىمدىك شارۋاشىلىعىن سۋبسيديالاۋ مەن قىزمەت كورسەتۋگە جەرگىلىكتى بيۋدجەتتەن 2,6 ملرد تەڭگە ءبولىنىپ, سونىڭ 595 ملن تەڭگەسى يگەرىلگەن ەكەن.
«بۇدان بولەك, كوكتەمگى دالا جۇمىستارىنا جانە ەگىن وراعىن نەسيەلەۋگە وبلىسقا 21,4 ملرد تەڭگە ءبولىندى. سونىڭ ىشىندە «اگرارلىق نەسيە كورپوراتسياسى» ارقىلى – 18,4 ملرد تەڭگە, «Aqjaiyq» الەۋمەتتىك كاسىپكەرلىك كورپوراتسياسى» ارقىلى 3 ملرد تەڭگە ءتۇستى. بۇگىندە شارۋالارعا 5 پايىزدىق وسىممەن 9,2 ملرد تەڭگە نەسيە بەرىلدى. سونىمەن قاتار 1,3 ملرد تەڭگەگە جۋىق نەسيەنىڭ ءوتىنىمى قارالىپ جاتىر», دەيدى بەرىك سەيىتقازيەۆ.
باتىس قازاقستان وبلىسى
