فوتو: ۆيدەودان سكرين/قما
اتا-انا بالاسىنىڭ دەنساۋلىق جاعدايى تۇسىرىلگەن بەينەروليكتى Instagram جانە Facebook ارقىلى جارنامالاعان. ولار تۇركياداعى LIV Hospital كلينيكاسىندا 84 ملن تەڭگە تۇراتىن وتا جاساتامىز دەگەن جەلەۋمەن 1,3 ملرد تەڭگەدەن استام كولەمدە قاراجات جيناعان.
الايدا بالانىڭ ەمىنە تەك 6,4 ملن تەڭگە جۇمسالعان. قالعان قاراجاتقا ەرلى-زايىپتى استانادان 3 پاتەر, جەر تەلىمى, 5 اۆتوكولىك ساتىپ العان. سونىمەن قاتار, قاراجاتتىڭ ءبىر بولىگىن قۇمار ويىندارىنا سالعان.
قايىرىمدىلىق قارجىسىن تۇراقتى تۇردە الىپ وتىرۋ ءۇشىن ولار جينالعان قاراجاتتىڭ ۇشتەن ءبىر بولىگىن (481 ميلليون تەڭگەدەن استام) الەۋمەتتىك جەلىدەگى پاراقشالارىن جارنامالاۋعا باعىتتاعان. Meta Ads ارقىلى جۇرگىزىلگەن جارناما اۋديتوريانى ەداۋىر كەڭەيتىپ, قايىرىمدىلىق كولەمىن ارتتىرۋعا مۇمكىندىك بەرگەن.
«كۇدىكتىلەر تۇركياداعى LIV Hospital كلينيكاسىندا 84 ملن تەڭگە تۇراتىن وتا جاساتامىز دەگەن جەلەۋدى دە پايدالانعان. قاجەتتى سوما جينالعانىمەن, شەتەلدە وتا جاسالماعان. كەرىسىنشە, ولار Instagram پاراقشاسىندا اۋەجايداعى «ۇشىپ بارا جاتقان» كورىنىستى بەينەلەيتىن روليك جاريالاپ, وپەراتسيا ءساتتى ءوتتى دەگەن جالعان اقپاراتپەن جازبا سالعان», دەلىنگەن قارجى مونيتورينگ اگەنتتىگىنىڭ حابارلاماسىندا.
كۇدىكتىلەر سوتقا دەيىنگى تەرگەپ-تەكسەرۋ باستالعانىن بىلگەندە قىلمىستىق جولمەن الىنعان اكتيۆتەردى تاركىلەۋدەن جاسىرۋ ماقساتىندا جەر تەلىمىن ءۇشىنشى تۇلعانىڭ اتىنا راسىمدەگەن. تەرگەۋ بارىسىندا بۇل مامىلەنىڭ جالعان ەكەنى دالەلدەنگەن.
سوت سانكتسياسىمەن قىلمىستىق جولمەن الىنعان م ۇلىكتەردىڭ بارلىعىنا تىيىم سالىنعان. كۇدىكتىلەرگە قاتىستى بۇلتارتپاۋ شاراسى رەتىندە ۇيقاماق ءتۇرى تاڭدالعان. قازىرگى ۋاقىتتا قىلمىستىق ءىس سوتتا قارالىپ جاتىر.
