فوتو: سۋ رەسۋرستارى جانە يرريگاتسيا مينيسترلىگى
ىلە وزەنى ارقىلى كەلگەن سۋدىڭ قاپشاعاي سۋ قويماسىن (الماتى وبلىسى) ەكىنشى جىل قاتارىنان 100 پايىز تولتىرۋى – ءوز كەزەگىندە بالقاش كولىنە 8,52 ملرد تەكشە مەتر سۋ جىبەرۋگە مۇمكىندىك بەردى. ناتيجەسىندە جىل باسىنان بەرى بالقاشتىڭ سۋ دەڭگەيى ورتا ەسەپپەن 341,55 مەتردەن 341,87 مەترگە دەيىن كوتەرىلدى.
قر سۋ رەسۋرستارى جانە يرريگاتسيا مينيسترلىگىنىڭ قىتايمەن جانە رەسەيمەن سۋ سالاسىنداعى ىنتىماقتاستىعى باسقارماسىنىڭ باسشىسى ناعيما اجىعۇلوۆانىڭ ايتۋىنشا, قحر-مەن ىنتىماقتاستىق ترانسشەكارالىق وزەندەردى عانا قامتىمايدى. بيىل ناۋرىز ايىندا قازاقستان مەن قىتايدىڭ سۋ ۆەدومستۆولارى العاش رەت ءوزارا تۇسىنىستىك پەن ىنتىماقتاستىق تۋرالى مەموراندۋمعا قول قويدى.
«اتالعان قۇجاتتا رەسۋرستاردى ءتيىمدى ءارى تۇراقتى پايدالانۋدى قامتاماسىز ەتۋ, زاماناۋي تەحنولوگيالاردى ەنگىزۋ, بالامالى سۋ كوزدەرىن ءبولۋ جانە يگەرۋ, سونداي-اق تاجىريبە الماسۋ مەن بىرلەسىپ كادرلار دايارلاۋ جونىندەگى ىنتىماقتاستىقتى نىعايتۋ كوزدەلگەن», دەدى ن.اجىعۇلوۆا.
