فوتو: اشىق دەرەككوز
تۋريستەر تاتيانا گۋرينوۆيچ پەن دميتري پرونەۆيچتىڭ ايتۋىنشا, ولار دەمالىس ورنىنا بارۋدىڭ ورنىنا, ناعىز «توزاقتى» باستان وتكەرگەن. ساپار ۇيىمداستىرۋشىلىق كەلەڭسىزدىكتەردەن باستالعان: تۋرفيرما ەشقانداي كەلىسىمشارت بەرمەگەن, ال ەكسكۋرسياعا ارنالعان اۆتوبۋس وتە تار,10 ەرەسەك ادامعا ارنالماعان بولىپ شىققان. الايدا ولار ساپارعا شىعۋعا كەلىسىم بەرگەن.
15 ساعاتقا سوزىلعان ەكسكۋرسيادان كەيىن, كەرى قايتار جولدا, اقتاۋدان 90 شاقىرىمداي جەردە اۆتوبۋس سىنىپ قالعان. تۋريستەردىڭ ايتۋىنشا, ولاردى باسقا اۆتوبۋسقا وتىرعىزعان, الايدا ول اۆتوبۋس تولىپ كەتكەن جانە بۇزىلعان اۆتوبۋستى تىركەپ كەلە جاتقان. ادامداردى جينالمالى ورىندىقتارعا وتىرعىزعان.
«كەنەتتەن اياق استىمدا وت تۇتانىپ, جالىن توبەگە دەيىن جەتتى. ادامدار ۇرەيگە بەرىلىپ, ايقايلاپ, سومكەلەرمەن, كۇرتەشەلەرمەن وتتى سوندىرۋگە تىرىستى. بىراق اۆتوبۋستا بىردە-ءبىر ءورت سوندىرگىش بولمادى. جۇرگىزۋشى كەلىپ, كىمنىڭ شىلىم شەككەنىن سۇرادى. كويلەگىمنىڭ ەتەگى جانىپ, اياعىم كۇيىپ قالدى. ءبىز كۇيەۋىم ەكەۋمىز ءوز بەتىمىزشە شىعىپ, جولشىباي كولىكپەن اقتاۋعا قايتتىق», دەدى تاتيانا گۋرينوۆيچ.
تۋريستەر قاسيەتتى ورىن قارامان اتاعا ساپار كەزىندە تۋرفيرمانىڭ مۇلدە دايىن بولماعانىن دا اتاپ ءوتتى. ولار بۇل جەرگە قىسقا شولاقتى شالبارمەن كەلۋگە بولمايتىنىن جانە ايەل ادامدارعا ورامال تاعۋ مىندەتتى ەكەنىن ەشكىم ەسكەرتپەگەنىن ايتتى.
وقيعادان كەيىنگى كۇنى, تۋريستەردىڭ ايتۋىنشا, تۋرفيرما وكىلدەرى ولاردىڭ جاعدايىن سۇراپ, بايلانىسقا شىقپاعان. كەيىن تۋريستەر وزدەرى وپەراتورعا حابارلاسقان. ول بولسا, ءورتتىڭ شىعۋىنا جولاۋشىلاردىڭ ءبىرىنىڭ ورىندىققا قويعان پاۋەربانكى سەبەپ بولعانىن, سونىڭ سالدارىنان ورىندىق تۇتانىپ كەتكەنىن ايتقان.
تاتيانا مەن دميتري ساپار بارىسىندا ورىن العان بارلىق كەمشىلىكتەردى كومپانياعا كورسەتكەن. تۋروپەراتور ولاردى جاقىن ارادا جوياتىنىنا سەندىرگەن. قازىرگى ۋاقىتتا تۋريستەر تۋرفيرمانىڭ اتاۋىن جاريالاماۋدى سۇراپ وتىر.
ء«بىزدىڭ ماقساتىمىز جازالاۋ ەمەس, پروبلەمالاردى شەشۋ. ادامداردىڭ جۇمىسىنان ايىرىلعانىن قالامايمىز. بىراق تۋريستىك كومپانيالار قاۋىپسىزدىك تەحنيكاسىنىڭ قاراپايىم تالاپتارىن ساقتاپ, كليەنتتەرىنىڭ ءومىرى مەن دەنساۋلىعىنا جاۋاپكەرشىلىكپەن قاراۋى ءتيىس», دەپ ءتۇسىندىردى ولار.
