كوميسسيانىڭ كەزەكتى وتىرىسى

كەشە قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدى­قالى­قوۆانىڭ تورايىمدىعىمەن شەتەل­دە كادرلار دايارلاۋ جونىندەگى رەس­پۋب­ليكالىق كوميسسيانىڭ كەزەكتى وتىرىسى ءوتتى.  كوميسسيا وتىرىسىن اشا وتىرىپ, گۇل­شارا ابدىقالىقوۆا «بولاشاق» ستيپەنديا­سىنىڭ ەلدى ينستيتۋتتىق رەفورمالاۋ ۇدەرىسىندەگى ايرىقشا ءرولىن ايتا كەلە, بولاشاقتىقتاردىڭ الەۋەتىن مەملەكەت باسشىسىنىڭ «بەس ينستيتۋتتىق رەفور­ماسىن ىسكە اسىرۋ بويىنشا 100 ناقتى قادام» – ۇلت جوسپارىن ورىنداۋعا بارىنشا تارتۋ قاجەت­تىگىن اتاپ ءوتتى. ءبىلىم جانە عىلىم ءمينيسترى اسلان ءسارىنجىپوۆ «بولاشاق» حا­لىقارالىق ستيپەندياسىنىڭ 2016-2020 جىلدارعا ارنالعان دا­مۋ جوسپارىنىڭ جوباسىن ۇسىندى. جوسپاردىڭ ماقساتى ەكو­نوميكانىڭ ورنىقتى دامۋى ءۇشىن ساپالى ءبىلىمنىڭ قول­جەتىمدىگىن قامتاماسىز ەتۋ ارقى­لى ادامي كاپيتالدى دامىتۋ, ءبىلىم­نىڭ باسەكەگە قابىلەتتىلىگىن ارت­تىرۋ بولىپ تابىلاتىنى جەت­كىزىلدى. كوميسسيا مۇشەلەرى «بو­لا­شاق» باعدارلاماسى بويىن­شا Split PhD ىسكە اسىرۋ تۇجى­رىم­داماسىن ماقۇلدادى. تۇجى­رىمداما قازاقستاننىڭ يندۋس­تريالىق-يننوۆاتسيالىق دامۋ مەم­لەكەتتىك باعدارلاماسى شەڭ­بەرىندە ەلدەگى جوعارى وقۋ ورىندارىندا عىلىمي كادر­لار دايارلاۋدىڭ جاڭا جۇيەسىن ەن­گى­زۋدى كوزدەيدى. كوميسسيا وتىرىسىندا الدىن الا كونكۋرستىق ىرىكتەۋدەن وتكەن ۇمىتكەرلەرگە «بولاشاق» حالىق­ارالىق ستيپەندياسىن تاعايىنداۋ ماسەلەسى قارالدى. وتىرىس قورىتىندىسى بويىنشا گۇلشارا ابدىقالىقوۆا شە­تەلدە كادرلار دايارلاۋ جونىندەگى رەس­پۋبليكالىق كوميسسيانىڭ جۇ­­مىسىن ودان ءارى ۇيىمداستىرۋ اياسىندا بىرقاتار تاپسىرمالار بەردى. وتىرىسقا اتالعان كوميس­سيا­نىڭ مۇشەلەرى قاتىستى. جاقسىباي سامرات, «ەگەمەن قازاقستان».