د.سەكسەنباەۆ دارىگەرلىكپەن قوسا ۇلاعاتتى ۇستاز بولدى, عالىم رەتىندە كوپ ىزدەنىستەر جۇرگىزدى. سوندىقتان ونىڭ ءومىر جولى كوپكە ونەگە. اسىرەسە ونىڭ ادالدىق پەن ەڭبەكقورلىق قاسيەتى مەديتسينا ماماندىعىن تاڭداعان جاستار ءۇشىن ۇلگى بولۋى ءتيىس.
دەرىبسالى 1939 جىلدىڭ قاڭتارىندا قىزىلوردا وبلىسى, ارال اۋدانىنا قاراستى ۇيالى اۋىلىندا دۇنيەگە كەلدى. بالالىق شاعىنان ەڭبەككە ەرتە ارالاسىپ, تراكتور ايداپ, قۇرىلىس الاڭىندا جۇمىس ىستەدى. بىراق, ول بالا كەزىنەن دارىگەر بولۋدى ارمانداۋشى ەدى. بۇل ارمان ونى 1956 جىلى الماتى مەملەكەتتىك مەديتسينا ينستيتۋتىنا جەتەلەدى. وقۋىن تامامداعان جاس مامان ماقتاارال اۋداندىق اۋرۋحاناسىنا جۇمىسقا تۇرادى. دارىگەرلىك ءوزىنىڭ ءسۇيىپ تاڭداعان ماماندىعى بولعاندىقتان ءوز كاسىبىنە بارىنشا ادال بولۋعا تىرىستى.
1964 جىلى وبلىستىق كلينيكالىق اۋرۋحانانىڭ كەۋدە حيرۋرگياسى ءبولىمىنىڭ مەڭگەرۋشىسى اتاندى. بۇل قىزمەتتى تابان اۋدارماي 26 جىل اتقاردى. 1990 جىلدان 2002 جىلعا دەيىن وسى اۋرۋحانانىڭ باس دارىگەرى قىزمەتىن اتقاردى. مەديتسينالىق مەكەمەنى زاماناۋي قۇرىلعىلارمەن جابدىقتاۋعا, حالىقارالىق تاجىريبەلەردى ەنگىزۋگە باستاماشىلىق تانىتتى. بۇل – وڭىرلىك مەديتسينانىڭ سەرپىندى دامۋ كەزەڭى ەدى. وسى ءىستىڭ باسى-قاسىندا دەرىبسالى اعامىز تۇردى.
ء«بىلىم الىپ ينەمەن قۇدىق قازعان» دەرىبسالى سەكسەنباي ۇلى بار بىلگەنىن شاكىرتتەرىنە ۇيرەتىپ كەتتى. وڭتۇستىك قازاقستان مەديتسينا اكادەمياسىندا حيرۋرگيا كافەدراسىن اشۋعا اتسالىستى. بۇل وقۋ ورداسى ءۇشىن تاريحي وقيعا ەدى. جاڭاشىل عالىم مەديتسينالىق اكادەمياعا زاماناۋي اپپاراتتار ورناتىپ, جاڭاشا ەمدەۋ ادىستەرىن وقىتتى. ونىڭ باسشىلىعىمەن فاكۋلتەتتىك جانە گوسپيتالدى حيرۋرگيا كافەدراسى قۇرىلىپ, بۇگىنگى تاڭدا ونى قانشاما مامان ءبىتىرىپ شىقتى.
عالىم رەتىندە ول ءار كۇنىن ىزدەنىس پەن زەرتتەۋگە ارنادى. حيرۋرگيانىڭ ەڭ كۇردەلى سالالارى سانالاتىن توراكالدى, ابدومينالدى, ءىرىڭدى حيرۋرگيا بويىنشا عىلىمي ەڭبەكتەر جازدى. ونىڭ باستاماسىمەن 2000 جىلى وبلىستىق اۋرۋحاناعا العاش رەت زاماناۋي جابدىقتار اكەلىنىپ, قازاقستاندا تۇڭعىش رەت لاپاروسكوپيالىق وتالار جاسالدى. كەيىن بۇل تاجىريبە وزگە وڭىرلەرگە دە كەڭىنەن تارالىپ, مىڭداعان ادامنىڭ ءومىرىن ساقتاپ قالۋعا كومەكتەستى.
60 جىلدىق ەڭبەك جولىندا د.سەكسەنباەۆ 34 مىڭنان استام وتا جاساپ, حالىقتىڭ العىسىن ارقالادى. ونىڭ ىشىندە 47 جىلدان استام ۋاقىت وڭتۇستىك قازاقستان مەديتسينا اكادەمياسىندا ءدارىس وقىپ, ء ىزباسار تاربيەلەدى. بۇگىندە ونىڭ شاكىرتتەرى ەلىمىزدىڭ تۇكپىر-تۇكپىرىندە ابىرويلى قىزمەت اتقارىپ ءجۇر. ءتىپتى اراسىندا وتە كەرەمەت جەتىستىكتەرگە جەتكەن ماماندار دا بار.
عالىم كوزى تىرىسىندە 400-دەن استام عىلىمي ەڭبەك جازدى, 7 ىرگەلى ەڭبەك جاريالاپ ۇلگەردى. ونىڭ «جايىلمالى ءىرىڭدى پەريتونيتتى كەشەندى باعالاۋ جانە ەمدەۋ» اتتى دوكتورلىق ديسسەرتاتسياسى مەديتسينا عىلىمىندا وتە جوعارى باعالاندى. «قازاقستان حيرۋرگتارى» قاۋىمداستىعىنىڭ مۇشەسى بولعان ول رەسپۋبليكالىق عىلىمي كونفەرەنتسيالاردا 27 مارتە بايانداما جاساعان.
ەرەن ەڭبەگى ەسكەرىلگەن عالىم «كسرو دەنساۋلىق ساقتاۋ ءىسىنىڭ ۇزدىگى» توسبەلگىسىمەن, ۆدنح سسسر كۇمىس مەدالىمەن, قر دەنساۋلىق ساقتاۋ مينيسترلىگىنىڭ قۇرمەت گراموتالارىمەن, «قازاقستان رەسپۋبليكاسىنىڭ ەڭبەك سىڭىرگەن دارىگەرى» اتاعىمەن ماراپاتتالدى. مەملەكەت تاراپىنان بەرىلەتىن ەڭ جوعارى ماراپاتتاردىڭ ءبىرى «پاراسات» وردەنىن يەلەندى. جانە بىرەگەي ماراپات «التىن سكالپەل» يەگەرى اتاندى.
د.سەكسەنباەۆ ارامىزدان كەتسە دە ارتىندا وشپەس ءىز قالدىردى. ونىڭ مۇراجايدا ساقتالعان سكالپەلىنەن تالاي جان شيپا تاپتى. سوندىقتان ادامداردىڭ العىسىنا بولەنگەن ازاماتتىڭ ەسىمى ەشقاشان ۇمىتىلماق ەمەس.
ديلارا بيمەنوۆا, وڭتۇستىك قازاقستان مەديتسينا اكادەمياسىنىڭ ءباسپاسوز حاتشىسى
