فوتو: اشىق دەرەككوز
قالا اكىمدىگى اتالعان ۇسىنىستى ءماسليحاتتىڭ قاراۋىنا جىبەرگەن. كوشەلەرگە عىلىم, مادەنيەت, ونەر سالاسىندا ايرىقشا ەڭبەك سىڭىرگەن تانىمال تۇلعالاردىڭ ەسىمدەرى بەرىلمەك.
اتاپ ايتقاندا, اۋەزوۆ اۋدانىنداعى كوشەلەرگە بەلگىلى عالىمدار, ءتىل ماماندارى — اكادەميك ءابدۋالي قايدار مەن رابيعا سىزدىقتىڭ ەسىمدەرى بەرىلەدى. سونداي-اق, وسى اۋداندا الەمدەگى تۇڭعىش بالالارعا ارنالعان مۋزىكالىق تەاتردىڭ نەگىزىن قالاۋشى ناتاليا ساتستىڭ ەسىمى دە ءبىر كوشەگە بەرىلمەك.
بوستاندىق اۋدانىنداعى ءبىر كوشەگە 2018 جىلى قايعىلى جاعدايدا قازا تاپقان ايگىلى مانەرلەپ سىرعاناۋشى دەنيس تەننىڭ ەسىمى بەرىلەدى. سونىمەن قاتار, قازاق انيماتسياسىنىڭ نەگىزىن قالاۋشىلاردىڭ ءبىرى — امەن قايداروۆتىڭ ەسىمى دە وسى اۋداننىڭ ءبىر كوشەسىنە بەرىلۋى جوسپارلانعان.
الاتاۋ اۋدانىندا كوشەلەرگە ابايتانۋدى عىلىمي نەگىزدەۋشى, شاكارىمتانۋدىڭ نەگىزىن قالاۋشى, تەكستولوگ قايىم مۇحامەدحانوۆتىڭ, سونداي-اق ۆەتنام حالقىنىڭ بوستاندىعى جولىندا كۇرەسكەن مەملەكەت قايراتكەرى حو شي ءميننىڭ ەسىمدەرىن بەرۋ ۇسىنىلعان.
ەستەرىڭىزگە سالا كەتەيىك, وتكەن جىلى دا الماتى قالاسىنىڭ ءماسليحاتى مەگاپوليستەگى بىرقاتار كوشەلەردى قايتا اتاۋ تۋرالى ۇسىنىستى قولداعان بولاتىن. سونىڭ ناتيجەسىندە قالادا ەرمەك سەركەباەۆ, ۆلاديمير تولوكوننيكوۆ, ەسكەندىر حاسانعاليەۆ جانە يۋري پومەرانتسەۆ سياقتى ونەر مايتالماندارىنىڭ ەسىمدەرىمەن اتالعان جاڭا كوشەلەر پايدا بولدى.
