فوتو: ۇكىمەت
كولىك مينيسترلىگىنىڭ مالىمەتىنشە, بيىلعى ءبىرىنشى جارتىجىلدىقتا قازاقستاندىق اۆياكومپانيالار 7,2 ملن جولاۋشى تاسىمالداعان. بۇل وتكەن جىلدىڭ سايكەس كەزەڭىمەن سالىستىرعاندا 6%-عا ارتىق. اۋەجايلاردا جولاۋشىلارعا قىزمەت كورسەتۋ كولەمى 14,4 ملن ادامعا دەيىن ارتقان. قازىرگى ۋاقىتتا ىشكى اۆياتاسىمالدار جالپى جيىلىگى اپتاسىنا 849 رەيس بولاتىن 61 باعدار بويىنشا ورىندالىپ ءجۇر.
كەيىنگى جىلدارى قازاقستاندا 20 ۇشۋ-قونۋ جولاعى, 19 تەرمينال رەكونسترۋكتسيالانىپ, تۇركىستاندا جاڭا اۋەجاي سالىندى. كولىك ءمينيسترى نۇرلان ساۋرانباەۆ بيىل اۋە كەمەلەرى پاركىن 16 بىرلىككە تولىقتىرۋ كۇتىلىپ وتىرعانىن, ونىڭ 6-ۋى بۇگىندە ساتىپ الىنعانىن باياندادى. جالپى, 2030 جىلدىڭ سوڭىنا دەيىن فلوت 221 بىرلىككە دەيىن ۇلعايتىلادى. سونداي-اق 2025 جىلى 36 باعداردى اشۋ جانە جاڭارتۋ جوسپارلانعان. ينۆەستيتسيالىق باعدارلامالار شەڭبەرىندە اۆياتسيا سالاسىنا بارلىعى شامامەن $2,9 ملرد تارتۋ كوزدەلىپ وتىر. قاراجاتتى ءىرى جوبالاردى جۇزەگە اسىرۋعا, اتاپ ايتقاندا, كاتونقاراعاي, زايسان, كەندىرلى, سونداي-اق ارقالىق تۋريستىك ايماقتارىندا جاڭا اۋەجايلار سالۋ, 10 ۇشۋ-قونۋ جولاعى مەن 10 تەرمينالدى رەكونسترۋكتسيالاۋ, ارنايى تەحنيكا پاركىن جاڭارتۋ جۇمىستارىنا جۇمسالماق.
جيىندا جۇك اۆياكومپانياسىن قۇرۋ جونىندەگى باستامانىڭ ىسكە اسىرىلۋ بارىسى قارالدى. جوبا الەمدىك جۇك اۆياتاسىمالى نارىعىنىڭ تۇراقتى وسۋىنە بايلانىستى قولعا الىنعالى وتىر. بۇگىنگى تاڭدا ونداعى كولەم 57,7 ملن توننانى قۇرايدى. بۇل رەتتە تاسىمالداردىڭ شامامەن 15%-ى قازاقستاننىڭ اۋە كەڭىستىگى ارقىلى وتەدى.
«سامۇرىق-قازىنا» ۇاق» اق باسقارما توراعاسى نۇرلان جاقىپوۆ الەمدىك تاجىريبەگە سايكەس باستاپقى كەزەڭدە ءۇش اۋە كەمەسىن جالعا الىپ, كەيىننەن فلوتتى ون بىرلىككە دەيىن كەڭەيتۋ كوزدەلىپ وتىرعانىن باياندادى. ۇلتتىق جۇك اۆياتاسىمالداۋشىنىڭ وپەراتورلىعىمەن العاشقى رەيستى ىسكە قوسۋ 2026 جىلدىڭ باسىنا جۇزەگە اسىرۋ جوسپارلانىپ وتىر. جوبا ءوزىن- ءوزى اقتاۋى ءۇشىن وتىنمەن قامتاماسىز ەتۋدىڭ كەپىلدەندىرىلگەن كولەمى قاراستىرىلىپ جاتىر.
پرەمەر-مينيستر جۇك اۆياتاسىمالداۋشىسىن قۇرۋ بويىنشا بارلىق دايىندىق پروتسەسىن بارىنشا جەدەلدەتۋدى تاپسىردى.
«پرەزيدەنت قاسىم-جومارت توقاەۆ قازاقستاندى ايماقتاعى جەتەكشى اۆياتسيالىق حاب رەتىندە كۇشەيتۋ مىندەتىن قويدى. قازىرگى تاڭدا اۋەجاي ينفراقۇرىلىمىن جانە ىشكى تاسىمالداردى دامىتۋ بويىنشا كەشەندى جۇمىستار جۇرگىزۋدە. سونىڭ ىشىندە جۇك اۆياتاسىمالداۋشىنى قۇرۋ – نەگىزگى جوبالاردىڭ ءبىرى. ونى جۇزەگە اسىرۋ ترانزيتتىك جۇك اعىندارىن قازاقستانعا قاراي بۇرۋعا مۇمكىندىك بەرەدى جانە جۇك اۆياتاسىمالى نارىعىنداعى ءبىزدىڭ ۇستانىمىمىزدى كۇشەيتەدى», دەدى ولجاس بەكتەنوۆ.
