فوتو:كوللاجدى جاساعان زاۋرەش سماعۇل, «EQ»
ءمينيستردىڭ ايتۋىنشا, ەسەپتى جىلى ازاماتتار مەن ۇيىمدار ءۇشىن تاۋ-كەن سالاسىندا 15 مەملەكەتتىك قىزمەت قولجەتىمدى بولعان, ولاردىڭ 14-ءى ونلاين فورماتتا كورسەتىلگەن. جالپى ءبىر جىل ىشىندە 979 مىڭ قىزمەت كورسەتىلسە, ونىڭ 919 مىڭى ەلەكتروندى تۇردە جۇزەگە اسقان. بۇل كورسەتكىش بارلىق قىزمەتتەردىڭ 87,6%-ىن قۇرايدى.
سۇرانىسقا يە مەملەكەتتىك قىزمەت تۇرلەرى كەلەسىدەي:
- تاۋ-كەن جانە حيميالىق وندىرىستەردى پايدالانۋ جونىندەگى قىزمەتتى جۇزەگە اسىرۋعا ليتسەنزيا بەرۋ — 462 قىزمەت;
- ەۋرازيالىق ەكونوميكالىق وداقتىڭ كەدەندىك اۋماعىندا نەمەسە ودان تىس جەرلەردە تاۋارلاردى قايتا وڭدەۋ شارتتارى تۋرالى قۇجات بەرۋ — 437 قىزمەت;
- گەولوگيالىق جانە (نەمەسە) تاۋ-كەن بولىمدەرىن بەرۋ جانە قايتا رەسىمدەۋ — 55 قىزمەت.
سونىمەن قاتار جاسلان ماديەۆ تاۋ-كەن سالاسىنداعى بيزنەس-ۇدەرىستەردى رەينجينيرينگتەۋ بويىنشا جۇمىستار جۇرگىزىلىپ جاتقانىن اتاپ ءوتتى. بۇل شارالار مەملەكەتتىك باسقارۋدى تسيفرلىق ترانسفورماتسيالاۋ اياسىندا جۇزەگە اسىرىلىپ جاتىر.
مينيستر رەينجينيرينگ مىسالى رەتىندە گەولوگيالىق جانە تاۋ-كەن بولىمدەرىن بەرۋ جانە قايتا رەسىمدەۋ ۇدەرىسىن كەلتىردى. بۇرىن بۇل راسىمدەر قاعاز تۇرىندەگى وتىنىشتەر, ەلەكتروندىق پوشتا نەمەسە e-Otinish جۇيەسى ارقىلى جۇرگىزىلىپ, دەرەكتەر قولمەن تەكسەرىلەتىن. بۇل قاراۋ مەرزىمىن ۇزارتىپ, قاتەلىكتەر قاۋپىن ارتتىراتىن.
ايتا كەتەيىك, قازىر بۇل ۇدەرىس تولىعىمەن اۆتوماتتاندىرىلعان. وتىنىشتەر جەر قويناۋىن پايدالانۋدىڭ بىرىڭعاي ونلاين پلاتفورماسى — minerals.e-qazyna.kz ارقىلى قابىلدانادى. پلاتفورمادا شەكتەۋلەردى اۆتوماتتى تۇردە تەكسەرەتىن جۇيە مەن جەر قويناۋىن پايدالانۋدىڭ ينتەراكتيۆتى كارتاسى ىسكە قوسىلعان.
«بۇل كەزەڭدەردىڭ سانىن 45%-عا قىسقارتتى جانە بيزنەس رولدەرىنىڭ سانىن 35%-عا ازايتۋ ارقىلى اكىمشىلىك جۇكتەمەنى تومەندەتتى. ۇدەرىستىڭ تيىمدىلىگى, اشىقتىعى مەن ىڭعايلىلىعى ارتتى, ادامي فاكتوردىڭ اسەرى ازايدى. سونىمەن قاتار, ىڭعايلى ونلاين ۇدەرىستىڭ ارقاسىندا پايدالانۋشىلار تاراپىنان سەنىم نىعايدى», دەدى مينيستر جاسلان ماديەۆ.
