مينيسترلىكتىڭ مالىمەتىنشە, قازاقستاننىڭ يسپانياداعى ەلشىسى دانات مۇساەۆ سەرۆانتەس ينستيتۋتىنىڭ ديرەكتورى لۋيس گارسيا مونتەرومەن كەزدەسۋ وتكىزدى. تاراپتار ءبىلىم, مادەنيەت جانە ءتىل الماسۋ سالالارىنداعى ەكىجاقتى ىنتىماقتاستىقتى كەڭەيتۋ ماسەلەلەرىن تالقىلادى.
كەزدەسۋ بارىسىندا قازاق جانە يسپان تىلدەرىندەگى العاشقى سوزدىكتى ازىرلەۋ تۋرالى باستاما كوتەرىلدى. بۇل جوبانىڭ ىسكە اسۋى ەكى ەل اراسىنداعى مادەني قارىم-قاتىناستار مەن اكادەميالىق ديالوگتى تەرەڭدەتۋگە مۇمكىندىك بەرەدى.
سونداي-اق تاراپتار مادەني-گۋمانيتارلىق سالادا ناقتى بىرلەسكەن جوبالاردى ىسكە اسىرۋعا دايىن ەكەندەرىن مالىمدەدى.
ايتا كەتەيىك, يسپان ءتىلى – الەم بويىنشا ەڭ كوپ تارالعان تىلدەردىڭ ءبىرى. قازىرگى ۋاقىتتا شامامەن 600 ملن ادام يسپان تىلىندە سويلەيدى, ونىڭ 470 ميلليونى انا ءتىلى رەتىندە قولدانۋشىلار. ءتىل 21 ەلدە رەسمي مارتەبەگە يە.
ال قازاقستاندا يسپان ءتىلى كەڭىنەن وقىتىلمايدى. ورتا مەكتەپتەر مەن جوعارى وقۋ ورىندارىندا نەگىزىنەن اعىلشىن, فرانتسۋز جانە نەمىس تىلدەرى وقىتىلادى. وسى رەتتە قازاق-يسپان سوزدىگى مەن وقۋ قۇرالدارىنىڭ بولماۋى ايقىن سەزىلەدى.
