سۇمدىق جايت تۋرالى جۋرناليست ساندۋعاش دۇيسەنوۆا الەۋمەتتىك جەلىدەگى پاراقشاسىندا جازدى. وقيعا جەتىسۋ وبلىسىنىڭ اقسۋ اۋدانىنا قاراستى بالاساز اۋىلىندا بولعان.
اقپاراتقا سايكەس, مارقۇمنىڭ تۋىستارى 32 جاستاعى ايزات جۇمانوۆا كۇيەۋى ايبار جانبولاتتىڭ قولىنان قازا تاپتى دەپ وتىر. قايعىلى وقيعا 2 جاسار قىزىنىڭ كوز الدىندا بولعان.
- تۋىستارىنىڭ سوزىنشە, ەرلى-زايىپتىلار اراسىندا جانجال شىققان. ارتىنشا بىرنەشە ساعاتقا سوزىلعان ادام سەنگىسىز جايتتار بولدى. ايزاتتى ەرەكشە قاتىگەزدىكپەن ساباعان. مەديتسينالىق ساراپتاما قورىتىندىسىنان ادام شوشيدى. باس-مي جاراقاتى, مي ءىسىنۋى, باس سۇيەگى نەگىزىنىڭ سىنۋى, اياق-قول مەن جامباس سۇيەكتەرىنىڭ بىرنەشە جەردەن سىنۋى, دەنەنىڭ جەرگە سۇيرەلۋ ىزدەرى. تۋىستارىنىڭ پايىمداۋىنشا, ايزاتتىڭ قولىن ارقانعا بايلاپ, جىلقىمەن سۇيرەگەن, – دەپ جازادى جۋرناليست.
جەتىسۋ وبلىستىق پوليتسيا دەپارتامەنتى 22 ماۋسىم كۇنى ساعات 02:30 شاماسىندا ايزات جۇمانوۆا وبلىستىق اۋرۋحاناعا جەتكىزىلگەنىن حابارلادى. دارىگەرلەر كەلگەننەن كەيىن جارتى ساعات ىشىندە ول كوز جۇمعان.
قازىر سوتقا دەيىنگى تەرگەپ-تەكسەرۋ امالدارى باستالدى.
- اتالعان قىلمىستىق ءىس جەتىسۋ وبلىسى پوليتسيا دەپارتامەنتى باسشىلىعىنىڭ ەرەكشە باقىلاۋىنا الىندى. قازىر كۇدىكتى رەتىندە جابىرلەنۋشىنىڭ جۇبايى ۇستالدى. ول ۋاقىتشا ۇستاۋ يزولياتورىنا قامالدى, – دەلىنگەن حابارلامادا.
سوت-مەديتسينالىق ساراپتامالار تاعايىندالدى.
