قاسكەلەڭدەگى حالىقارالىق دەڭگەيدەگى ءبىلىم
New York Film Academy (NYFA) – كينو, انيماتسيا, گەيم-ديزاين سىندى سالالار بويىنشا الەمدىك دەڭگەيدەگى كاسىبي ماماندار دايارلايتىن جەتەكشى وقۋ ورىندارىنىڭ ءبىرى. بيىل وسى اكادەميانىڭ قازاقستانداعى رەسمي فيليالى – NYFA Kazakhstan ءوز جۇمىسىن باستادى. ول كاسكەلەن قالاسىندا, Energo University جانىنداعى Dala.edge كرەاتيۆتى تەحنولوگيالار پاركىنىڭ نەگىزىندە ورنالاسقان.
بۇل – ازيا قۇرلىعىنداعى NYFA-نىڭ العاشقى ءارى جالعىز كامپۋسى. وقۋ ورنىنىڭ اشىلۋى بيىلعى 1 ناۋرىزدا نيۋ-يورك كينواكادەمياسىنىڭ پرەزيدەنتى مايكل يانگتىڭ قاتىسۋىمەن وتكەن ونلاين راسىمدە رەسمي بەكىتىلدى.
گرانتتىق باعدارلاما كىمدەرگە ارنالعان؟
جاڭا وقۋ جىلى قارساڭىندا Dala.edge پاركى مەن NYFA Kazakhstan جاس تالانتتار ءۇشىن ارنايى گرانتتىق باعدارلاما جاريالادى. اتالعان كونكۋرسقا كرەاتيۆتى يندۋسترياعا قىزىعۋشىلىق تانىتقان, ءوز مۇمكىندىگىن سىناپ كورگىسى كەلەتىن جاستار قاتىسا الادى. بۇل باعدارلاما شىعارماشىل جاندارعا الەمدىك دەڭگەيدەگى ءبىلىمدى ەل ىشىندە الۋعا جاعداي جاساپ وتىر.
گرانتتار ەكى باعىت بويىنشا بەرىلمەك:
-
3D-انيماتسيا جانە ۆيزۋالدى ەففەكتىلەر (3D Animation and VFX);
-
گەيم-ديزاين (Game Design).
باعدارلاما اياسىندا تولىق (100%) جانە جارتىلاي (50%) گرانتتار ۇسىنىلادى. جەڭىمپازدار ءبىر جىل بويى اتالعان باعىتتار بويىنشا ءبىلىم الۋعا مۇمكىندىك الادى.
كونكۋرسقا قاتىسۋ ءۇشىن ۇمىتكەرلەر 1 تامىز 2025 جىلعا دەيىن kaz.nyfa.edu رەسمي سايتى ارقىلى ءوتىنىش بەرىپ, وزدەرىنىڭ شىعارماشىلىق جۇمىستارىن ۇسىنۋى ءتيىس. ءوتىنىش قالدىرعان ءاربىر تالاپكەر اۆتوماتتى تۇردە گرانتتىق بايقاۋعا قاتىسۋشى رەتىندە تىركەلەدى.
ايتا كەتۋ كەرەك, وقىتۋ باعدارلامالارىن تاجىريبەلى امەريكالىق وقىتۋشىلار جۇرگىزەدى. ال سوڭىندا بەرىلەتىن حالىقارالىق ۇلگىدەگى سەرتيفيكات NYFA-نىڭ نيۋ-يورك جانە لوس-اندجەلەس قالالارىنداعى كامپۋستارىندا تابىستالاتىن قۇجاتتارمەن تەڭ دارەجەدە تانىلادى. بۇل – كاسىبي مانساپتى الەمدىك ارەنادا جالعاستىرۋعا جول اشاتىن رەسمي قۇجات.
گرانت يەگەرلەرى وقۋ باعدارلاماسىنان تىس, Dala.edge ەكوجۇيەسىنىڭ تولىققاندى مۇشەسى اتانادى. بۇل دەگەنىمىز – كرەاتيۆتى جوبالارعا قارجىلاي قولداۋ, تەحنيكالىق بازاعا (ستۋديا, جابدىق, تسيفرلىق قۇرالدار) قولجەتىمدىلىك, كاسىبي مەنتورلىق جانە سالالىق قاۋىمداستىقپەن بايلانىس مۇمكىندىگى بەرىلەدى.
مۇنداي ينتەگراتسيا جاس مامانداردىڭ تەك ءبىلىم الۋىمەن شەكتەلمەي, بىردەن شىعارماشىلىق يندۋستريانىڭ وندىرىستىك ۇدەرىسىنە ارالاسۋىنا جول اشادى. بۇل – قازاقستانداعى كرەاتيۆتى ەكونوميكانىڭ دامۋىنا سەرپىن بەرەتىن ناقتى قادام.
ەلىمىزدەگى NYFA فيليالىنىڭ اشىلۋى مەن گرانتتىق باعدارلامانىڭ ىسكە قوسىلۋى – تەك ءبىلىم بەرۋ سالاسى ءۇشىن ەمەس, ەلدەگى كرەاتيۆتى ەكونوميكانىڭ قالىپتاسۋىنا دا ماڭىزدى وقيعا. جاڭا تولقىن – جاڭا يندۋستريانىڭ قوزعاۋشى كۇشىنە اينالۋى ءتيىس. وسى تۇرعىدان العاندا, NYFA Kazakhstan ۇسىنىپ وتىرعان باعدارلاما – الەمدىك تاجىريبە مەن جەرگىلىكتى تالانتتىڭ ءتۇيىسۋ نۇكتەسى.
