دەگەنمەن تۇرعىندار تاراپىنان «ايداي سالدان از ءولدى, كورە سالدان كوپ ءولدى» دەيتىن قامسىزدىق تىيىلماي تۇرعانىن دا ايتا كەتكەنىمىز ارتىق بولماس. ولاردىڭ مالىنىڭ قولدى بولعانىن كەش بايقاپ, پوليتسەيلەرگە ۋاقىت وتكىزىپ بارىپ حابار بەرۋى دە تالاي قىلمىستىڭ دەر كەزىندە اشىلماۋىنا سەبەپ بولىپ وتىر. ءوز بەتىنشە ىزدەپ, تابانىنان تاۋسىلىپ جۇرگەندە ۇرلانعان مال مەن ۇرىنى ىزدەستىرۋدى جەڭىلدەتەتىن ماڭىزدى ايعاقتار مەن ىزدەر جوعالىپ كەتەتىنى دە بار.
وسىعان دەيىنگى پوليتسەيلەر ءار اۋىلدا مىندەتتى تۇردە باقتاشى قويۋ تۋرالى سان مارتە ۇسىنىس بەرگەن. ءتىپتى وعان جۇمىسسىز ازاماتتاردى تارتۋ ارقىلى ۇرلىقتى تا ازايتىپ, جۇمىسسىزدىق كورسەتكىشىن دە تومەندەتۋگە بولاتىنىن دا ايتقان. اۋەلگىدە باياۋ جۇرگەن بۇل ءىس قازىر قالىپقا تۇسكەن سياقتى. پوليتسيا مال ۇرلىعىنىڭ الدىن الۋ باعىتىندا پروفيلاكتيكانى كۇشەيتۋدەن بولەك باقتاشىلارمەن دە سويلەسىپ, ءتيىستى ءتۇسىندىرۋ جۇمىستارىن قولعا الدى. ولارعا مال ۇرلىعى جاسالعان جاعدايدا قانداي جازا قولدانىلاتىنىن ءتۇسىندىرىپ, ءتيىستى ەرەجەلەر جازىلعان جادىناما قاعازدار تاراتتى.
ارينە, ۇرىنىڭ كوزىنە اۋەلى قاراۋسىز جۇرگەن مال تۇسەدى. ونى ءبىر-ەكى كۇن بارلاپ, ىزىندە جۇرگەن ەشكىمنىڭ جوعىن بايقاعاسىن ىڭعايىن تاۋىپ الىپ كەتەدى. وسىدان دا بەلگىلەنبەگەن ورىنداردا جايىلىپ جۇرگەن مالىنا قاراماعان
215 ادام اكىمشىلىك جاۋاپكەرشىلىككە تارتىلدى. ۆەتەريناريا قىزمەتكەرلەرىمەن بىرلەسىپ اتقارىلعان رەيدتىك ءىس-شارالار بارىسىندا جالپى 160 اكىمشىلىك قۇقىق بۇزۋشىلىق انىقتالىپتى. ونىڭ
93-ءى – مال نەمەسە ەت ونىمدەرىن زاڭسىز تاسىمالداۋ دەرەگى.
اپتا سايىن پوليتسيا قىزمەتكەرلەرى وبلىس ورتالىعىنداعى كبي شاعىن اۋدانىندا ورنالاسقان بازارعا مال تاسىعانداردى توقتاتىپ, مالدىڭ قۇجاتتارىن تەكسەرەدى. وسى جىلى جەدەل-ىزدەستىرۋ ءبولىنىسى قىزمەتكەرلەرى مال ۇرلىعىن كاسىپ قىلعان 4 توپتى ۇستادى. سىرداريا اۋداندىق پوليتسيا ءبولىمى – 8, شيەلى اپب – 3, قازالىدا – 1, قارماقشى اۋداندىق پوليتسيا بولىمىندە 2 ەپيزودتىق قىلمىس اشىلىپ, قازىرگى وسى دەرەكتەر بويىنشا تەرگەپ-تەكسەرۋ ارەكەتتەرى جۇرگىزىلىپ جاتىر.
ءتىپتى قايىرۋ كورمەگەن مالدىڭ كۇرە جولعا شىعىپ كەتىپ, تالاي اپاتقا سەبەپ بولىپ جاتقانى دا بار. جىل باسىنان بەرى وسىنداي 10 جول-كولىك وقيعاسى تىركەلىپ, سونىڭ سالدارىنان 2 ادام ءتۇرلى جاراقات العان. وبلىستىق ءماسليحاتتىڭ 2020 جىلعى 21 قازانداعى №473 شەشىمىمەن ايماقتا اۋىل شارۋاشىلىعى جانۋارلارىن جايۋ قاعيدالارىن بەكىتۋ تۋرالى ەرەجە ازىرلەنگەن. قازاقستان رەسپۋبليكاسى اكىمشىلىك قۇقىق بۇزۋشىلىقتار تۋرالى كودەكسىنىڭ 408-بابىنىڭ تالاپتارىنا سايكەس وبلىستىق پوليتسيا دەپارتامەنتى جىل باسىنان ەرەجەنى ساقتاماعان 313 مال يەسىن اكىمشىلىك جاۋاپكەرشىلىككە تارتقان.
«قالا, اۋدان ورتالىعىندا ورنالاسقان مال بازارلار مەن وعان كەلەتىن كۇرە جولداردا, ەت ساتۋ ورىندارىندا جۇيەلى تۇردە رەيدتىك ءىس-شارالار جالعاسا بەرەدى. جەدەل-پروفيلاكتيكالىق شارالار اياسىندا بۇرىن جاسالعان مال ۇرلىقتارىنىڭ 7 دەرەگى اشىلدى. مال ۇرلىقتارىنىڭ الدىن الۋ جانە اشۋ باعىتىندا جۇمىستار ناتيجەسىندە پادا ۇيىمداستىرىلىپ, باقتاشىلار بەلگىلەندى. بۇرىنعىعا قاراعاندا, بۇل باعىتتاعى جۇمىس ءبىراز جۇيەلەندى. دەگەنمەن مال بازارلارى مەن ەت ونىمدەرىن ساتاتىن ورىندار, مال سويۋ تسەحتارى ۇنەمى تەكسەرىلسە دە ءاربىر تۇرعىن قورا مەن ورىستەگى مالىنا جاۋاپكەرشىلىكپەن قاراپ, ساقتىق شارالارىن كۇشەيتكەنى ءجون», دەيدى وبلىستىق پوليتسيا دەپارتامەنتىنىڭ باستىعى, پوليتسيا پولكوۆنيگى سەرىك ەرگەشوۆ.
قىزىلوردا
