قۇزىرلى ورگاننىڭ مالىمەتىنشە, زەرتحانا ەۋرازيالىق ەكونوميكالىق وداقتىڭ كو تر 011/2011 «ليفتتەردىڭ قاۋىپسىزدىگى» تەحنيكالىق رەگلامەنتى شەڭبەرىندە باعالاۋ جۇرگىزگەنىمەن, بۇل ارەكەت ونىڭ اككرەديتتەۋ سالاسىنا كىرمەيتىن كورسەتكىشتەردى قامتىعان. مۇنداي قادام «سايكەستىكتى باعالاۋ سالاسىنداعى اككرەديتتەۋ تۋرالى» زاڭنىڭ 14-بابى 5-تارماعىنا قايشى كەلەدى. اتالعان زاڭ تالابىنا سايكەس اككرەديتتەلگەن ۇيىمدار تەك ءوز قۇزىرەتىنە جاتاتىن جۇمىستارمەن اينالىسۋى ءتيىس جانە نورماتيۆتىك تالاپتاردى بۇلجىتپاي ورىنداۋعا مىندەتتى.
«سايكەستىكتى باعالاۋ جۇيەسىندەگى تالاپتاردىڭ ساقتالۋى, اسىرەسە ليفت سياقتى كۇردەلى تەحنيكالىق نىسانداردىڭ قاۋىپسىزدىگىنە قاتىستى بولعان جاعدايدا, اسا وزەكتى. سوندىقتان ءبىز وسى سالادا جۇمىس ىستەيتىن بارلىق تاراپتاردى بەلگىلەنگەن زاڭنامالاردى قاتاڭ ۇستانۋعا شاقىرامىز. بۇل – ىقتيمال تاۋەكەلدەردى ازايتىپ, جابدىقتاردىڭ قاۋىپسىز ءارى سەنىمدى قولدانىلۋىنا جول اشادى», دەدى ساۋدا جانە ينتەگراتسيا مينيسترلىگىنە قاراستى تەحنيكالىق رەتتەۋ جانە مەترولوگيا كوميتەتىنىڭ توراعاسى جاننا ەسەنبەكوۆا.
ناتيجەسىندە سىناق زەرتحاناسىنا 2 ميلليون 320 مىڭ تەڭگەدەن استام كولەمدە ايىپپۇل سالىنىپ, زاڭعا قايشى ارەكەتتەردى تۇزەتۋ تۋرالى نۇسقاما بەرىلدى.
